Ari-arian ng mag-asawang naghiwalay ng legal dapat hatiin agad

Dapat na hatiin din agad ang ari-arian ng mga mag-asawang naghiwalay ng legal o na-annulled ang kasal.

Sa panukalang batas na inihain ni Cebu Rep. Nerissa Corazon Soon-Ruiz, sinabi nito na dapat nang amiyendahan ang Article 100 at 127 ng Executive Order No. 209 o mas kilala sa tawag na Family Code of the Philippines.

Sa kasalukuyang batas, ang legal separation ng isang mag-asawa ay walang epekto sa kanilang conjugal partnership o ari-arian dahil na rin marahil sa posibilidad na muli silang magsama o magkabati.

Bagaman at legal na magkahiwalay ang isang mag-asawa, ang anumang kinikita o naipupundar ng mga ito ay ikokonsidera pa ring bahagi ng conjugal property.

"Masyado itong unfair sa asawang nagpundar dahil hindi naman siya binigyan ng material o moral support ng kanyang hiwalay na asawa para ma-acquire ang property na kanyang nakuha," pahayag ni Ruiz.

Sa panukala ni Ruiz, nais nitong magkaroon ng retroactive effect ang legal separation o deklarasyon ng nullity o marriage sa hahatiing ari-arian ng mag-asawa.

Ang dapat lamang umanong paghatian ay ang mga naipundar habang nagsasama ang dalawa at hindi ang mga properties na naipundar ng isa habang sila ay magkahiwalay o hinihintay ang desisyon ng korte kaugnay sa kanilang legal separation o pagpapawalang bisa sa kasal. (Ulat ni Malou Rongalerios-Escudero)