Nabatid kay Atty. Ric Diaz, tagapagsalita sa Nida Blanca case at hepe ng NBI Interpol na hawak na ng NBI ang kumpletong listahan na nakapaloob ang numero ng telepono na tumawag sa aktres at oras kung kailan tumawag at dito nadiskubre na si dela Paz ang may pinakamaraming tawag.
"The time of call was crucial to the investigation and the record of the telephone company is a solid evidence that will help investigators put up several pieces of puzzle," sabi ni Atty. Diaz.
Sa masusing pagsasaliksik ng NBI, lumalabas na karamihan sa mga tawag na natanggap ng aktres bago ito patayin ay sa loob ng kanyang opisina sa MTRCB na nagmula kay dela Paz.
Ayon kay Diaz, nakatakda sanang dumalo sa misa ang aktres dakong alas-7 ng gabi noong Nobyembre 6 sa Sanctuario de San Antonio sa Forbes, Makati City para dumalo sa ika-siyam na araw ng pagkamatay ng kanyang malapit na kaibigan na si Bong Erana, kasama ang iba pang kaibigan subalit nagbago ang isip nito at kinansela ang lakad dahil sa naging tawag ni dela Paz.
Idinagdag pa ni Diaz na dapat umanong maipaliwanag nang husto ni dela Paz kung ano ang kanilang mga pinag-usapan ng aktres at nagawa nitong mapagbago ang isip ni Nida na dapat sana’y may ibang lakad noong Nobyembre 6.
Hindi rin paliligtasin ang mga opisyal ng MTRCB na nakasama ni Nida sa panonood at pagre-review ng mga sinasalang na pelikula at iba pang malalapit na kaibigan nito.
Nilinaw naman ni Diaz na sakaling hindi pumayag ang mga artistang nabanggit na tumungo sa NBI ay ang mga ahente ang tutungo sa kani-kanilang tahanan para doon sila kunan ng salaysay.
At kung hindi pa rin umano sila puwede sa kani-kanilang mga bahay, kahit sa shooting ay pupuntahan sila ng mga NBI agent.
Pagbabasehan rin sa mga salaysay ng mga artista kung sila ay dapat ring isalang sa polygraph o lie detector test.(Ulat ni Ellen Fernando)