Si Kaye kasama ang kanyang Lolang si Inocencia ay sinamahan ni National Bureau of Investigation (NBI) Director Reynaldo Wycoco ng magsadya kahapon sa Malacañang para personal na makausap ang Presidente.
Ang kanilang pagkikita ay matapos i-request ni Kaye kay Wycoco ang posibleng pakikipag-miting sa Pangulo para sa isang private conversations.
Sa kanilang pag-uusap ay siniguro sa kanila ng Pangulo na walang "white wash" sa imbestigasyon at ipinangakong mabibigyan ng katarungan ang malagim na pagkamatay ng beteranang aktres. Wala nang ibinigay pang detalye hinggil sa naturang miting.
Tumanggi naman si Presidential Spokesman Rigoberto Tiglao na magkomento kung ang paghingi ng tulong ni Kaye ay dahil na rin sa pagkabigo ng PNP Task Force Marsha na mapatunayan ang bintang na si Rod Lauren Strunk ang utak ng krimen matapos umatras ang self-confessed killer na si Philip Medel Jr.
Dahil sa umano’y kapalpakang ito ng PNP ay ibinigay ni Kaye sa NBI ang buong kapangyarihan para hawakan ang imbestigasyon sa kaso. (Ulat ni Lilia Tolentino)