Sinabi ni Ople na siyang chairman ng Senate committee on foreign relations na tapos na ang limang taong kontrata na ibinigay ng Amerika sa mga dayuhan sa recruitment ng mga nurses at hindi dapat na magpaloko ang mamamayan sa mga matatamis na pangako at malaking suweldo.
Dahil dito, inatasan ni Ople ang Philippine Overseas Employment Administration (POEA) na magsagawa ng pagsisiyasat dahilan sa ginagamit pa ng ilang recruitment agencies ang inaprubahan nilang ads sa kabila na ito ay tapos na.
Nakalagay sa ads na inilalathala sa mga pahayagan na sila ay nangangailangan ng maraming nurses upang punan ang malaking kakulangan ng mga nurses sa Amerika at kahit na walang CGFNS ay maaaring makapasa.
Batid anya ng marami na ang CGFNS ang pangunahing requirement ng Estados Unidos bago ka makapag-apply bilang isang nurse ngunit kakaiba ang ads na humihimok sa mga Filipino nurses na hindi na ito kailangan pa.
Kailangang pangunahan ng POEA ang pagpapaliwanag sa mga aplikante na patungong US na tapos na ang malawakang recruitment at hindi binabago nito ang requirement na kailangan ng CGFNS bago ito makapag-apply, dapat na habulin nito ang mga recruiters na siyang naglalathala pa ng ads sa kabila na tapos na ang recruitment. (Ulat ni Rudy Andal)