Extradition vs Aquino, Mancao isasampa

Nakatakdang magsampa ng extradition request ang Department of Justice (DOJ) sa Estados Unidos upang mapabalik sa bansa sina Supts. Michael Ray Aquino at Cesar Mancao.

Ayon kay DOJ Secretary Hernando Perez, masusing pinag-aaralan ngayon ng prosecution ang gagawing pagsasampa ng extradition case laban sa dalawang dating opisyal ng binuwag na Presidential Anti-Organized Crime Task Force (PAOCTF) na sangkot sa pagpatay kay PR man Salvador "Bubby" Dacer at driver nitong si Emmanuel Corbito.

Sinabi ni Perez na tinitiyak pa ng DOJ kung kasalukuyan pa rin nagtatago sa New Jersey si Aquino habang si Mancao naman ay nasa Canada na.

Ito umano ang nagiging dahilan kung bakit natatagalan ang pagsasampa ng nasabing kaso laban sa dalawa. (Ulat ni Grace Amargo)