Live coverage ng Erap trial ibinasura ng SC

Muling ibinasura kahapon ang kahilingan ng Department of Justice (DOJ) at ng Kapisanan ng mga Brodkaster sa Pilipinas (KBP) na magkaroon ng live coverage sa pagdinig sa kaso ni dating Pangulong Estrada, pero pumayag na magsagawa ng audio-visual recording para sa "documentary purposes."

Sa botong 8-7 ay pumayag ang mga mahistrado sa footages at audio recordings ng paglilitis sa argumentong ang plunder case laban sa dating pangulo ay may "historical significance." Layunin ng audio-visual recording na magamit ito ng appelate courts kapag kinailangang masagawa ng review sa kaso. Ayon kay Justice Vicente Mendoza, ang master film ay idedeposito sa National Museum at Records Management and Archives Office para sa historical preservation at exhibition. (Ulat ni Andi Garcia)