600 empleyado sa House mawawalan ng trabaho

Dahil sa pagtatapos ng 11th Congress ngayong darating na buwan, tinatayang 600 empleyado ng Mababang Kapulungan ng Kongreso ang mawawalan ng trabaho.

Ayon kay Congressional Staff Association (CONSA) president Bebot Diaz, ang mga empleyadong maaapektuhan ay pawang mga staff ng mga kongresistang hindi na makakabalik sa papasok na 12th Congress.

Sinabi ni Diaz na 49 kongresista ang umabot sa kanilang ikatlo at huling termino bukod pa sa mga kongresistang hindi na makakabalik sa kanilang posisyon bunga ng pagkatalo sa nakaraang eleksiyon.

Natatapos ang serbisyo ng staff kapag natapos na ang term ng isang mambabatas dahil coterminus ang kanilang pamamalagi sa Kongreso. (Ulat ni Malou Rongalerios)