84 Pinoy peacekeeping force sabak sa East Timor

Tumulak kahapon ng umaga ang 84 na miyembro ng Philippine National Police patungong East Timor para maging bahagi ng peacekeeping force roon ng United Nations.

Sila ang ikaanim na grupo na magsisilbi bilang civilian police sa ilalim ng pamamahala ng UN Transitional Administration in East Timor.

Sinabi ni Acting PNP Chief Deputy Director Leandro Mendoza na ang pagpapadala ng mga pulis na Pilipino sa ibang bansa ay isang pagsuporta sa pagpapanatili ng UN sa kapayapaan sa naturang dating teritoryo ng Indonesia.

Pinamumunuan ni Supt. Renato Heredia ang umalis na grupo kahapon na papalit sa 84 katao na naunang ipinadala sa East Timor at takdang bumalik sa bansa pagkaraan ng isang taong pananatili roon. (Ulat ni Joy Cantos)