Si Phil. Army Commanding General Lt. Gen. Diomedio Villanueva, nagtapos sa Phil. Military Academy (PMA) Class 1968 ang napili at opisyal nang inihayag ni Pangulong Gloria Macapagal-Arroyo bilang pinuno ng AFP kapalit ng nakatakdang magretirong si AFP Chief of Staff Gen. Angelo Reyes.
Sa panayam, sinabi ni Villanueva na nagpapasalamat siya kay Pangulong Arroyo at siya ang napili sa posisyon kasabay ng pangakong hindi niya ito bibiguin sa pagtitiwala nito sa kanyang kakayahang pamunuan ang hukbong sandatahan.
Si Villanueva ay nakatakdang pormal na manungkulan bilang ika-30 Chief of Staff ng AFP sa ika-17 ng Marso o sa mismong araw ng pagreretiro ni AFP Chief Gen. Angelo Reyes.
Samantala, malugod namang tinanggap nina AFP Vice Chief Lt. Gen. Jose Calimlim, Air Force Chief Benjamin Defensor, AFP Deputy Chief of Staff Lt. Gen. Jaime delos Santos, Southern Command Chief Lt. Gen. Gregorio Camiling, at Phil. Marines Lt. Gen. Edgardo Espinosa na pawang naging kandidato sa nasabing posisyon ang pagtatalaga kay Villanueva.
Kaugnay ng pagkakahirang kay Villanueva bilang AFP Chief of Staff, sinabi ni Defense Secretary Eduardo Ermita na ang Pangulo ang siyang may karapatang magpasya at humirang ng AFP Chief of Staff. (Ulat nina Joy Cantos at Lilia Tolentino)