Bagong anomalya sa Marines nangamoy

Isang ghost project ng Marines na ginastusan ng P64.9 milyon ang natuklasan ng Philippine Navy bagaman hindi pa natatapos ang imbestigasyon sa mga maanomalyang pagbili ng ilang kagamitan ng naturang yunit-militar.

Kabilang ang naturang ghost project sa mga anomalya sa Marines na binanggit ng umalis na si Philippine Navy Flag Officer in Command Rear Admiral Guillermo Wong nang bulyawan niya ang mga opissyal ng Marines sa harap ng mga tauhan nito noong Pebrero 15. Iniimbestigahan na ito ng Office of Ethical Standards for Public Accountability ng Navy.

Tinutukoy dito na proyekto ang pagpapagawa ng bagong himpilan ng Marines sa Ternate, Cavite na binigyan ng pondo at dapat nang nagawa noon pang nakaraang anim na taon pero walang nakitang resulta rito. Kabilang sa proyekto ang pagpapagawa ng mga kalsada, water at drainage system, timber pier at electrical wiring. (Ulat ni Joy Cantos)