‘Freeze order’ sa mga accounts ni Erap ipapalabas ng BIR

Inutusan ng Department of Finance ang Bureau of Internal Revenue na magpalabas ng "freeze order" para sa lahat na depositong salapi ni Jose Velarde at iba pang mga alyas ni dating Pangulong Joseph Estrada sa iba’t ibang banko.

Ayon kay Francis Pangilinan, kabilang sa mga convenor ng KOMPIL 2, ang direktiba ay pinalabas ni Finance Undersecretary Cornelio Hizon sa BIR kasunod ng mga ulat na tangkang ilabas ni Estrada ang $3-M deposito sa Citibank sa Virra Mall, Greenhills, San Juan.

Ang Concerned Lawyers for Moral and Effective Leadership o CLAMOR ang umalerto sa BIR na bantayang mabuti ang mga depositong salapi habang hindi pa nao-audit ang kita ni Velarde at Kelvin Garcia na pinalalagay na ito ay kay Erap, gayundin ang deposito nina Dra. Loi Ejercito, Guia Gomez, Laarni Enriquez at Joy Melendrez. (Ulat ni Lilia Tolentino)