GMA nanumpa bilang bagong Pangulo

Nanumpa na kahapon si Gloria Macapagal-Arroyo bilang ika-14 na pangulo ng Pilipinas.

Isinagawa niya ang panunumpa sa harap ni Supreme Court Chief Justice Hilario Davide Jr. sa seremonyang ginawa sa EDSA Shrine na naging sentro ng pangalawang people power revolution na nagpabagsak sa administrasyon ni dating Pangulong Joseph Estrada.

Magkahalong galak at luha ang namayani sa nagbunying milyun-milyong mamamayang nagtipon-tipon sa EDSA Shrine at nagsigawan ng "Goodby Erap" at kumanta ng "Bayan Ko" makaraang manumpa si Arroyo sa bago nitong tungkulin.

Kasama ng bagong pangulo sa panunumpa ang kanyang asawa at mga anak.

Sinabi ni Manila Archbishop Jaime Cardinal Sin na nagwakas na ang madilim na bahagi ng kasaysayan ng bansa dahil sa matagumpay na people power 2 na "pumutok" nang tanggihan ng mayorya ng Senado ang isa pang ebidensya sa kasong impeachment laban kay Estrada.

Nangako si Arroyo na ibabangon niya sa kahirapan ang bansa at higit na pagbubutihin ang paglilingkod sa sambayanang Pilipino at ang moralidad at liderato rito.

Sa pulong-balitaan kasunod ng kanyang panunumpa, inihayag ni Arroyo na si Alberto Romulo ang hihirangin niyang kalihim ng Department of Finance ng kanyang administrasyon. Tumanggi siyang ihayag ang napipisil niyang iba pang miyembro ng kanyang Gabinete.

Sumuporta rin sa administrasyon ni Arroyo ang iba’t ibang bansa gaya ng mahihiwatigan sa pagdalo ng mga kinatawan ng mga ito sa kanyang inagurasyon.

Pinasalamatan din ni Arroyo ang sambayanan na siyang naging bayani sa pangalawang people power revolt na nagsimula noong Enero 16 at natapos sa paglisan ni Estrada sa Malacañang kahapon.

Sinabi rin ni Arroyo na ihahayag niya anumang araw ang itatalaga niyang Bise Presidente na pupuno sa iniwan niyang puwesto.

Nagkaisa naman ang mga neogosyanteng sina Jose Luis Yulo at Jose Concepcion sa pananaw na, sa pagbubukas ng pamilihan sa Lunes, inaasahang tatatag at tataas sa palitang P47 o P45 ang halaga ng piso bawat dolyar.

Nabatid na isang resolusyon ang ipinalabas ng Supreme Court na nagdedeklara na wala nang kakayahan si Estrada na mamuno sa bansa dahil sa pagbibitiw ng maraming miyembro ng kanyang Gabinete at pagkalas sa administrasyon nito ng Armed Forces of the Philippines at ng Philippine National Police.

Pinagbatayan din ng Mataas na Hukuman ang liham dito ni Arroyo na humihiling na panumpain na siya bilang bagong Pangulo.

Pagkatapos ng panunumpa, nagpasalamat din si Arroyo sa militar, pulisya at militanteng grupo at matataas na opisyal ng pamahalaan na nagkaisa para sa pagpasok ng kanyang administrasyon.

Tinapos ng pormal na pag-upo ni Arroyo bilang bagong pangulo ng bansa ang apat na araw na pagtitipon-tipon ng mga anti-Estrada group sa EDSA Shrine. Kahapon ng umaga, bago napabalita ang paglisan ni Estrada sa Malacañang, sumugod dito ang may 50,000 anti-Estrada group na kabilang sa mga naunang nagtungo sa EDSA Shrine.

Nagkaroon pa ng negosasyon ang kampo ng oposisyon at ni Estrada kamakalawa ng gabi. Binigyan ng oposisyon ng hanggang kahapong alas-6:00 ng umaga si Estrada para magbitiw sa tungkulin pero iginiit nito na mabigyan ito ng lima pang araw dahil may kailangan pa itong ayusin.

Sinabi naman kahapon ni Quezon City Congressman Feliciano Belmonte na hindi na maaaring kuwestyunin ang panunumpa ni Arroyo bilang bagong pangulo ng bansa.

Mismong si Davide anya ang nagpanumpa sa bagong presidente dahil alam nitong mas malalagay sa alanganin ang bansa kung hindi ito gagawin ng punong mahistrado.

Nagpahayag din ng suporta kay Arroyo ang liderato ng dalawang kapulungan ng Kongreso.

Bandang alas-2:00 ng hapon nang magsimulang magsilisan unti-unti ang mga nasa EDSA Shrine. Tinayang bandang alas-5:00 ng hapon, umabot na lang sa 5,000 hanggang 10,000 katao ang nasa naturang lugar na nagpasyang magsagawa ng party sa naturang lugar bilang pagsasaya sa kanilang tagumpay.

Kumita naman nang husto sa kasagsagan ng pag-aalsa sa naturang lugar ang mga nagtitinda ng tubig, pagkain, damit, head band, sticker, at iba pang souvenir. (Ulat nina Rose Tamayo, Joy Cantos, Rudy Andal, Ellen Fernando, Lilia Tolentino, Marilou Rongalerios, at Danilo Garcia)