Ito ang naging pahayag sa panayam kahapon ng DZRH kay Makati Congressman Joker Arroyo kaugnay sa nabunyag na binigyan umano ng P8 milyon ni Ilocos Sur Governor Luis "Chavit" Singson si Loi.
Ayon kay Joker mas malaki umano ang perang naibigay kina Guia Gomez at Laarni Enriquez kung ikukumpara sa tunay na asawa ng Pangulo.
"Ang mas malalaki ay sa ibang pamilya ng Pangulo,mas malalaki yun,mga milyon.Mas mataas ang kay Guia kumpara kay Laarni" wika ni Arroyo.
Sinabi pa nito na mas maliit ang ibinibigay naman kumpara sa dalawa pang pamilya ni Estrada na sina Weng Lopez at Joyce Melendez.
Subalit hindi naman ibinunyag ni Arroyo ang specific na halaga ng perang ibinibigay sa nasabing mga ‘babae’ ni Erap dahil sa hindi naman ito piniprisinta bilang ebidensiya.
Hindi pa rin napaplano ng prosecution panel kung ipiprisinta ang statement of assets and liabilities ng mga ‘babae’ ni Erap.
Nauna rito binunyag din ni Singson ang isang pang ‘babae’ ni Erap na si Joelle Pelaez,dating 2nd runner-up ng Binibining Pilipinas na binigyan ng balato na P2 milyon matapos na manalo sa casino sa loob ng barko.
Samantala sinabi rin ni Arroyo na walang silbi kung ipapatawag pa nila sina Loi at anak nitong si San Juan Mayor Jinggoy Estrada para humarap sa impeachment dahil sapat na umano ang mga ebidensiya na kanilang naiprisinta at bahala na silang magpaliwanag sa mamamayan. (Ulat ni Malou Rongalerios)