Gisamokan sa ex-BF

Dear Tito Miguel,

Ako diay si   Miley, taga Consolacion, Cebu.Naproblema ko sa akong ex-boyfriend nga si Jaybee kay sige og samok-samok nako.  Ako naman siya gi-block sa Facebook apan mangita gyud siya og paagi nga makakontak  nako. Kasagaran niya buhaton kay makigamit siya sa messenger sa among common friends aron lang gyud maka-chat nako. Nilungtad og duha ka tuig ang among relasyon, ug nagbuwag mi niadtong January kay nasakpan nako nga nag-iring iring siya og laing babaye.

Nangayo siya og sorry, apan wala nako dawata. Dili gyud ko ganahan makigbalik niya. Saputon sad ko sa iyang barkada kay support kaayo sila sa ilang amigo ug nitabang sila aron magbalik mi. Laktod pagka-istorya, lakip ang iyang barkada kay nagsamok-samok ug dili daw ko nila lung-an kay gusto nila nga magbalik ming Jaybee. Unsaon akong buhaton?  Gisamokan bitaw ko. — Miley

* * *

Miley,

Kun sa messenger ra ka gisamok samok niya o sa iyang mga higala, usa ra’y solusyon ana, ayaw basaha, ayaw tagda, ayaw tubaga, hangtod sila maluya. Pursigido siya ka’y imo tubagon o balibaran.Ang iyang tuyo aron makuha imong atensyon. Busa makab-ot ni niya kun imong tubagon. Maski nibalibad ka’g masuko na niya, samot siya ganahan ka’y kaniya nihatag ka’g panahon. Kun sige ka’g balibad, samot siya mahagit, para niya igo ra ka nagpalugit.

Busa kun daw wala ka’y nakita o nabasa, buot pasabot wala ka matandog maski unsa pa iya’ng patagad nga buhaton. Mora ra gud na’g gisungog sungog ka, kun magpakita ka nga napikon ka’g apektado, samot sila mogara. Ka’y kun imo patolan, tabla ra nga ang kalayo imong gisugnoran.

Apan kun di gyud ka mahimutang ug nahasol na sa ilang binuhatan, isumbong sa otoridad, sa barangay ba kaha o sa kapulisan. Usa kini ka matang nga krimen, unjust vexation ang tawag niini sa balaod. Konsulta’g abugado aron sigurado. Syaro’g dili moundang ug motagam. — Tito Miguel

Magpatambag ka? Ipada kang Tito Miguel: 0991-318-9366