Bagakay

Dear Tito Miguel,

Maayong adlaw, ako diay si Niel, taga Cordova, Cebu. Upat ka buwan na diay nga mabdos ang akong ka-live in partner nga si Loraine. Susama ming duha nga dili hilig og mga karaang too-too. Apan ang inahan ni Loraine kay magsige og pamugos nga magbutang og mga bagakay sa nagkadaiyang area sa among balay. Wala mi musugot kay samokan mi. Tungod kay supak mi sa iyang gusto, wala gyud mi tinggi sa inahan ni Loraine. Gusto niya nga siya ang matuman. Ana siya, importante daw ang bagakay alang sa proteksyon sa pagsabak ni Loraine. Dili gyud mi motuman kay samokan mi.  Unsa ang imong masulti Tito Miguel? — Niel

* * *

Niel,

Insakto mong duha sa imong asawa, wala’y koneksyon ang bagakay sa kahimsog ug kaluwasan sa inyong umaabot nga anak. Kun dili gyud mo motuman sa gusto sa imong ugangan, ipa-istorya kausa pa sa imong asawa. Dili ikaw, ka’y bakikaw. Mahimo kamo duha ang moatubang, apan ayaw’g tingog, tando lang ug pahiyom.

Apan ingna imong asawa nga sugdan sa pangayo’g pasaylo nga nibalibad mo, sundan sa pasalamat sa iyang pag-protektar sa umaabot nga apo. Lagmit moliwat niya, ka’y karon pa lang pinangga na kaayo niya. Sa maong paagi, dili negatibo ang pagbalibad ninyo, ma-excited pa siya. Apan sumpayi dayon sa pagpasabot nga ang mga kinaraan wala’y basehan sa siyensiya ug medisina.

Ingna pila ka milyon ang nagsabak ug nanganak karon sa tibuok kalibotan, luwas man lagi maski wala’y bagakay. Kun duna ma’y problema ang pipila, dili tungod ka’y wala motuman sa tuo-tuo, apan kay nisupak sa tambag sa doktor.  Lagmit moingon wala ma’y mawala kun motuman lang mo sa kinaraan. Tinuod, apan usahay mahimo nga kataw-anan. Ang tinuod, nakuhaan inyong kalinaw kay kamo gisamokan sa iyang tinuohan.

Karon kay nangluod man, pasagdi lang. Ini’g gawas sa bata, makalimot ra na siya sa tanan. Sigurado malipay siya’g mahinangop. Apan ayaw na ipamukha nga wala man lagi nahitabo sa bata maski wala’y bagakay. Dili na makatabang sa inyong relasyon. Siya na mismo makaamgo nga luwas ug himsog iyang apo maski wala mo motuman sa iyang gusto. — Tito Miguel

Magpatambag ka? Ipada kang Tito Miguel: 0991-318-9366