Gipanguyaban sa higala

Dear Tito Miguel ,

Ako diay si  Patricia , taga Barangay Labangon ,Cebu City .  Dugay nako nga single , ug  nalingaw raman sad ko.   Usa sa akong mga higala nga ginganlan og Franz  ang nanguyab nako karon. Wala nako sugta kay wala ko'y feelings niya. Ako siya giprangkahan nga wala'y chance nga magka-kami kay higala ra gyud ang akong pagtan-aw niya.  Bisan pa man sa akong hukom, dili gyud ko niya lung-an.  Naabot sa punto nga gisamokan nako. Na-feel nako, mao na seguro ning panahona nga maguba na among friendship tungod sa iyang pagkasamokan. Unsa ang imong matambag sa akong sitwasyon karon? — Patricia

* * *

Patricia,

Ayaw kaguol kun maguba inyong panaghigalaay. Kay ang tinuod, nawala na kini tungod ka’y kaniya duna na’y malisya unya ikaw amigo ra. Busa wala na mo’y angay ipadayon isip managhigala. Imo na man siya giklarohan nga kanimo wala siya’y maasahan, apan dili gihapon ka lung-an, putla na ang tanan paagi nga kamo makonektado. Ayaw na tubaga iyang mga tawag o chat, block dayon kun kinahanglanon. Likayi na nga magkita mo sa personal. Dili na pareha inyong panan-aw ug plano sa usa’g usa. Para kanimo amigo ra siya, apan siya naghinam hinam nga mahimo kang uyab. Dili na mo mag-abot.

Tinuod, anugon ang inyong panaghigalaay. Apan dili na ka niya amiga, ka’y labaw pa sa higala ang gusto niya nimo. Siguro naman daghan pa ka’g higala, dili lang siya. Ka’y kun magpadayon mo nga higala, bakikaw na kaayo kay kahibawo ka nga duna siya’y gusto nga dili mahatag nimo.

Kun dili na ka pakita o mokontak niya, kinahanglan desidido ka. Ka’y kun ikaw mobalibad apan mo-entertain gihapon niya, lagmit iya kining  sabton nga nagpalugit lang ka. Kun klaro imong  balibad sa pulong ug sa buhat, makasabot ra na’g mo-surrender na. Karon kun dili gihapon ka lung-an ug nahasol na ka, hulgaa nga mahimo nimo siya kihaan ug unjust vexation. Kun moabot ka ana nga punto, konsulta’g abugado aron sigurado.  —Tito Miguel

Magpatambag ka? Ipada kang Tito Miguel: 0991-318-9366