CEBU, Philippines — "Sobra Ra, Sobra Na" ug "Ikaduha" nakadaog sa 43rd Cebu Pop
Nagmalampuson ang gipahigayon nga 43rd Cebu Popular Music Festival niadtong Biyernes sa gabii didto sa University of the Visayas Gym.
Naglawig gyud niadtong gabhiona ang mga mga lig-ong huni nga dunay makahuloganon nga mensahe. Nakadaog sa Young Songwriters Category mao ang awit nga "Sobra Ra, Sobra Na" nga tinagik nila ni Eunice Lasola, Charles Laspinas ug Karl Otida.
Si Janeen Ugang ang interpreter sa maong awit. Samtang sa Love Song Category, nakadaog ang awit nga gimugna ni Paul Rosa nga nag-ulohan og "Ikaduha".
Giawit kini nila ni Jan Francis Alinsonorin, Jovie Loon ug Dave Alcano.
Napili nga Best Lyric Video ang awit nga Batan-ong Sugboanon, samtang ang Best Interpreter kay ang nag-awit sa "Tama Na, Ayaw Ako Pahilak" nga si Mary Therese Jade Damos.
Ang Cebu Popular Music Festival kay tinuig nga halad sa kanhi Amahan sa Talisay City ug sa unang distrito sa Sugbo nga si Atty. Eduardo Gullas inubanan sa The New Cebu Arts Foundation, Inc.
Ang pag-umol niya og Cebu Pop kay mao ang iyang pamaagi sa pagpadayag sa iyang dakong gugma ngadto sa Balaang Bata nga si Senor Santo Niño ug agig pag-abag usab sa paglambo pa og maayo sa Sugbuanong musika.
Sila si Sam Costanilla ug Apple Abarquez maoy hosts sa maong kalihokan.