Notado nga cheater

Dear Tito Miguel,

Maayong adlaw, ako diay si Ayessa, taga Barangay Labangon, Cebu City. Naa ko'y uyab nga ginganlan og Jobert nga taga Barangay Guadalupe, Cebu City. Tulo ka buwan na ang among relasyon. Naproblema ko kay dunay history si Jobert sa pagpanglimbong. Kasagaran sa rason nga nagbuwag sila sa kanhi niya nga mga uyab kay nakasala siya, laktod pagkaistorya kay dunay third party. Nahadlok ko kay basin ako nasad ang sunod nga mabiktima. Love man nako si Jobert, apan dili gyud malikayan nga maghuna-huna og daotan. Unsa akong buhaton aron mawala ang akong  gihuna -huna nga dili maayo? - Ayessa-

* * *

Ayessa,

Duna ka’y katarungan nga dili mahimutang. Nagbaga nga pula nga bandila ang kaagi sa imong uyab. Natural ra sa cheater ang manlingla, busa wala’y angay usbon, wala silay nakitang sayop kun mangita’g lain. Dili makuntento sa usa.

Apan duna’y pipila nga makakaplag ug babaye nga maoy makapausab nila. Basin ikaw na, busa mahimo ra nimo suwayan. Tutal ang tanang relasyon sugal man, wala’y garantiya ang tanan.

Duna bitaw abi nimo mora’g santo apan kalit lang nilikoy ug nisimang gikan sa insakto nga dalan. Duna sab abi nimo mangingilad apan diay maoy tarong ug ligdong o dili ba kaha nag-usab na.  Ka’y cheater man imong uyab, wala ka’y mahimo maski unsaon nimo’g hunahuna, ampo, pugong ug bantay niya. Kun wala pa siya mag-usab, mangita gyud na’g buslot aron makalusot. Ka’y dili man siya makuntento nimo, humok ra siya matintal sa lain. Gani, dili na siya mistil tintalon, siya na mismo manintal. Busa undangi na’g hunahuna’g dautan. Maski mag-unsa pa ka, mangita gyud na’g lain kun gusto niya. Dili nimo kontrolado iyang  pagkatawo. Ang angay nimo buhaton, tagamtama ang unsa’y naa ninyo karon. Ipakita kaniya nga ikaw ang babaye para kaniya. Ayaw’g imbestigar o bantay niya, ang kamatuoran mopakita ra’g iyaha sa panahon nga wa nimo damha. Kun mahitabo ang imong gikahadlokan, buot pasabot dili siya ang para kanimo. Sakit, apan mas maayo sayo pa mahibaw-an na nimo nga sa sugal sa gugma, kaniya ikaw pildero. Sa lain basin ikaw ang daogan. -Tito Miguel-

Magpatambag ka? Ipada kang Tito Miguel: 0991-318-9366