Worldwide Box Office “Hello, Love, Again" mikita na og kapin sa P1 billion
CEBU, Philippines — Ang record-breaking nga “Hello, Love, Again” nga gibitoonan nila ni Kathryn Bernardo ug Alden Richards kay nikita na og P1.06 bilyones (as of November 23), busa mao kini ang unang pelikulang Filipino nga milabaw sa P1 bilyon nga marka sa worldwide box office.
Nagsagunson gyud ang kalamposan sa maong pelikula. Kahinumdoman nga nikita kini og P85 milyones sa unang adlaw nga pagpasalida niini niadtong Nobiyembre 13.
Nakasulod usab kini sa US Top 10 box office partikular na sa no. 8.
Ang maong pelikula sa Star Cinema ug GMA Pictures kay nagsilbi usab nga closing film sa bag-o lang natapos nga Asian World Film Festival nga gipahigayon didto sa Los Angeles, California.
Gisugdan na ang pagpasalida sa “Hello, Love, Again” didto sa Hong Kong ug Macau.
Nagpadayon usab ang screening niini didto sa Austria, Finland, France, Germany, Greece, Ireland, Italy, Malta, Spain, Netherlands, ug UK.
Billy gibahaan og projects
Malipayon gyud ang Pasko ni Billy Crawford gumikan kay nagbaha ang umaabot niya nga mga proyekto.
Matud pa nga naglinya ang iyang mga konsyerto didto sa England.
Gawas sa iyang mga konsyerto, duna pud siya'y umaabot nga album.
Kever sa edad
Dili ra gyud manumbaling si Beauty Gonzalez sa ipanulti sa uban nga mga tawo kalabot sa kaminyoon nila ni Norman Crisologo . Nasayran nga 25 ka tuig ang ilang age gap.
"Destiny siguro. I didn’t ask for it. I didn’t look for it. Dumating lang talaga siya. And, great timing," saysay pa ni Beauty sa interview niini ni Karen Davila.
Birthday gift
Giisip ni Karla Estrada nga usa ka nindot nga birthday gift nga nadawat niya karong tuiga mao ang pag-abot sa labing una niya nga apo. Sa iyang Instagram story, gipasigarbo niya ang pagkahimugso sa anak nila ni JC Padilla ug Nathalia Valdivia. Ang maong bata kay ginganlan og Claudio.
Jorros ug Valerie nauyonan
Nataypan sa moviegoers ang pasiaw nila ni Valerie Concepcion ug Jorros Gamboa sa nagkadaiyang eksena sa pelikula nila ni Kathryn Bernardo ug Alden Richards nga "Hello Love Again". Giila sa mga nanan-aw ang dakong kontribusyon nila ni Valerie ug Jorros sa kalamposan sa maong pelikula.
Kutob ra sa Top 20
Ang pambato sa Puerto Rico nga si Daniel Mejia maoy nakaangkon sa korona isip Mr. World 2024 ug ang maong indigay gipahigayon sa Nova World, Phan Thiet, Binh Thuan, Vietnam niadtong Sabado.
Ang representante sa Pilipinas nga si Kirk Bondad kay nalandig lang sa Top 20 ug wala na kini nakatungtong sa Top 10. Kapin sa 70 ka mga kandidato ang nisalmot sa Mr. World 2024.
- Latest
