CEBU, Philippines — Ang “Hello, Love, Again” ang record-breaking romantic drama nga gibidahan nila ni Kathryn Bernardo ug Alden Richards kay mikulit og bag-ong box-office record human nikita kini og P930 million sa worldwide box office sulod sa 10 ka adlaw pa lang nga pagpasalida niini.
Mao na kini ang labing taas nga kita sa Filipino movie sa tanang panahon, nga nilabaw sa P924-million nga record sa pelikula nila ni Dingdong Dantes ug Marian Rivera nga “Rewind.”
Kahinumdoman nga ang maong kolaborasyon sa Star Cinema ug GMA Pictures kay gi-release sa mga sinehan niadtong Nobiyembre 13, nga nakaangkon og labing taas nga first-day gross nga P85 million.
Nakab-ot usab niini ang labing taas nga single-day ticket sales nga P131 milyones niadtong Nobiyembre 16.
Gipasalida usab kini sa Australia, New Zealand, US, Canada, Guam, Saipan, ug London.
Kasamtangang gipasalida ang maong pelikula sa kapin 1,000 ka mga sinehan sa tibuok kalibotan.
Sa laing bahin , nadawat na ni Kathryn ang award nga Snow Leopard Rising Star gikan sa Asian World Film Festival nga gipahigayon sa Los Angeles, California sa niaging adlaw .
“It is such an honor to be here, representing my fellow Filipinos and my home network, ABS-CBN. Thank you so much to the AWFF, my family, my mom—who’s here, my friends, my mentors, and to everyone who has believed in me throughout this journey. May we all continue to tell stories that will touch people’s lives,” saysay pa ni Kathryn atol sa iyang acceptance speech.