Dear Tito Miguel,
Ako diay si Paulo, taga Carmen, Cebu. Tulo ka buwan nami nga nagbulag sa akong ex-girlfriend nga si Grace. Naputol ang among relasyon kay nagbalik sila sa iyang ex. Apan hangtod karon, wala gihapon ko ka move on sa among breakup ug ganahan gyud ko manimalos sa iyang gibuhat dinhi kanako. Gusto ko nga makauyab nga mas molabaw pa ni Grace. Dili lalim ang iyang gibuhat nga pagpasakit dinhi kanako. Okay ra ba akong plano nga manimalos? If dili okay, unsa man angayan nako nga buhaton aron mawala akong pagdumot kang Grace? Daghang salamat. -Paulo-
* * *
Paulo,
Wala ka’y angay nga buhaton aron manimalos kaniya. Apan masabtan nga naglungot-lungot ka. Ikaw ang nailad ug naisahan sa imong uyab. Paminawa imong kaugalingon, ngano ganahan man ka manimalos?
Basin dili lang ka makadawat nga giilisan ka, lagmit garbo ra nimo ang natandog. Ganahan ka manimawos aron ipakita kaniya nga dili ka pildero ug masulob-on. Kun mao, dili pa nimo siya hingpit nga gihigugma. Mora lang ka’g bitter ka’y napildi sa duwa, dili pa tungod ka’y nawala siya.
Pasagdi ang ubang tawo ug sitwasyon ang mobalos para nimo. Kun dili karon, sa umaabot nga panahon. Gani kun swertehon ka, makita pa nimo ang iyang pag-antos. Apan dili na mistil, ang angay nimo buhaton, agihan nimo ang proseso aron makalimot ka niya ug sa iyang gibuhat.
Ayaw pugsa, ayaw dalia ug ayaw panguyab aron lang ka makabalos. Kun imo nang buhaton, tabla ra’g nigamit ka’g laing tawo aron ipamatuod nga nakakita ka’g mas labaw pa niya. Dili kinahanglan labaw kaniya ang imong sunod nga uyab, siguroha lang nga dili sama niya nga budhian ka. Dihang dapita, labaw na siya.
Panahon ra’y makapalimot nimo. Busa kinahanglan wala na siya’y labot sa imong mga lakang. Ka’y kun padayon ka nga magdumot, mora lang ka’g bata nga nailoga’g duwaan. Dako naman ka, ayaw na pangita’g duwaan, pares sa kinabuhi ang angay nimo nga pangitaon ug ipaglaban. -Tito Miguel-
Magpatambag ka? Ipada kang Tito Miguel: 0991-318-9366