CEBU, Philippines — Nag-release na og bag-ong awit nga nag-ulohan og “Cloud 9” ang rising Kapamilya singer-actress nga si Shanaia Gomez.
Siya mismo ang nagsulat niini nga nagtuyok sa istorya kalabot sa maangkon nga kalipay sa tawong dunay nagustohan.
Gi-produce kini ni StarPop label head Roque “Rox” Santos.
Kahinumdoman nga niadtong Hunyo, gipalanog ni Shanaia ang kantang “Slow Dancing” kun diin nalakip sa music video niini mao ang “Pamilya Sagrado” star nga si JC Galano.
Pasok pud ang maong awit sa Spotify EQUAL Philippines kauban ang single niya nga “Para Sa’yo.”
Nagsugod ang music career ni Shanaia sa dihang nisalmot siya sa unang season sa “Idol Philippines” niadtong 2019.
Nakasulod usab siya isip usa sa mga housemate sa “Pinoy Big Brother Kumunity Season 10.”
Niadtong 2022, hingpit siya nga nahimong recording artist human gilusad niya ang mga awit nga “Para Sa’yo” ug “Awake.” Gisudlan niya ang kalibotan sa acting world ug nakasulod siya sa pelikulang “Rewind " ug sa mga serye nga “Click, Like, Share,” “He’s Into Her,” ug “FPJ’s Batang Quiapo.”
Ang bag-ong awit ni Shanaia nga “Cloud 9” kay madungog sa nagkalain-laing streaming platforms.