EDITORYAL - West Philippine Sea itudlo sa mga tunghaan

Aron mas masabtan sa mga mosunod nga henerasyon sa Pilipinas kun unsa ang ilang gipakigbisogan diha sa West Philippine Sea, maayo kining nahunahunaan sa DepEd nga iapil na kini sa curriculum sa pagatun-an sa mga estudyante.

Usa kini ka maayong lakang aron maedukar ang mga Pilipino bahin sa WPS kun nganong giilogan kini karon sa mga silingang mga nasud nga naglakip sa Malaysia, Vietnam, Pilipinas, Brunei, Taiwan ug China.

Naglanog-lanog sa mga balita ang bahin sa WPS kun hisgutan na gani ang China. Apan samtang tinuod nakadungog ug nakabasa na sa mga balita ang daghang Pilipino bahin niini, pipila ra ang adunay klarong nahibaw-an kabahin niini.

Karon buot sa DepEd nga maapil na sa curriculum ang pagtudlo bahin sa WPS , ang mga tawo mahatagan og komprehensibong mga impormasyon kabahin sa maong teritoryo.

Niining paagiha mas makasabot ang tanan kung nganong dunay tension karon sa maong lugar. Pinaagi sab niini, kadaghanan sa mga tawo makasabot unya sa mga nagpaluyo sa mga lakang sa ilang mga lider matag dunay kontrobersiya o tension nga moulbo sa maong lugar.

Mas labing maayo pa gyud unta niini, nga unta hagbay ra gyud untang gihimo sa gobiyerno, kini mapa sa Pilipinas.

Kinahanglan nga ang opisyal nga mapa sa Pilipinas naa na apil ang Kalayaan Group of Islands diin nahimutang ang Pag-asa Island, ang labing dakong isla sa WPS nga gipuy-an na karon og gatosang mga Pilipino.

Kaning mapa man gud maghatag og ideya sa mga Pilipino dili lang kun asa ang lokasyon niini kondili ang importansiya aning mga isla sa ekonomiya, depensa ug seguridad, pagprotihir sa kalikupan, siyensiya, ug uban pang natural nga mga bahandi nga iya sa Pilipinas.

Bahala og uwahi na kining nahunahunaan sa mga opisyales sa gobiyerno kay sa kadugayan magbunga ra unya gihapon kini og kaayohan para sa Pilipinas.

Mas epektibong mapanalipdan sa mga Pilipino ang usa ka butang kun nasayod kini kun unsa kining iyang giprotektahan.