Nagkadayon gyud!

CEBU, Philippines — Gikasal na ang 23-anyos nga kanhi Miss Universe first runner-up nga si Nadia Ferreira ngadto sa 54-anyos nga Grammy award winner nga si Marc Anthony didto sa Miami, Florida niadtong Sabado.

Suma pa sa Hola! magazine, star-studded ang kasal diin lakip sa nasigpatan nga nitambong mao ang magtiayong David ug Victoria Beckham, si Salma Hayek, Lin Manuel Miranda, ug  ang Mexican business tycoon nga si Carlos Slim, kinsa maoy Best Man ug ang iyang asawa sab ang Maid of Honor.

Nasayran nga ang kanhi Spice Girl member nga si Victoria, kinsa designer ug aduna nay fashion label,maoy nagmugna sa gown sa bridesmaids. Nagpost siya kabahin sa kasal ug nagpasalamat kaniya si Nadia.

Ang Puerto Rican nga si Marc, kinsa nanimuyo na sa New York, kanhi bana ni Jennifer Lopez, diin nakabaton sila og mga kaluha niadtong 2004. Nagbulag sila niadtong 2014.

Una niini, naminyo si Marc ngadto kang kanhi Miss Universe Dayanara Torres niadtong 2000 diin aduna silay duha ka mga anak.

Si Nadia, nga usa ka international model, maoy pambato sa nasud sa Paraguay sa Miss Universe 2021.

Sila gyud!

Hingpit nang giangkon ni Paolo Contis--sa second part sa interview sa programang Fast Talk with Boy Abunda sa GMA7 niadtong Lunes sa hapon--nga aduna silay relasyon ni Yen Santos.

Apan niya pa, niadtong nasigpatan sila sa Baguio City, diin nauso ang "as a friend" nga linya, nakalarga na sa New York ang iyang kanhi partner ug inahan sa iyang anak nga si Summer, nga si LJ Reyes.

 “Ang samin kasi, kung baga, what you see is what you get na naman e, 'di ba? Hindi na namin pwedeng ipilit 'yung tao to be happy for us, hindi na namin pwedeng ipilit 'yung mga tao na paniwalaan 'yung gusto nilang paniwalaan. Sana lang isipin nila na kung ano lang 'yung nakikita nilang naka-post, 'yung lang ang truth na alam nila.” Ni Paolo pa.

Dili si Yen ang rason sa break up nila ni LJ. Dugay na matud pa silang may problema.

"One of my biggest mistakes was hindi ko inalala 'yung mental health. Isa 'yan sa feeling ko simula ng downfall namin. Hindi ko inisip 'yun. Plus 'yung pag-didiskarte ko ng sarili ko na hindi ko na iniinform sa kanya 'yung mga bagay-bagay, which led to bigger problems. I won't divulge na sa isyu na 'yun. Eventually it piled up. Again, hindi kami nag-uusap nang maayos.

Everytime na lalabas ako ng bahay dahil may pandemic, may work, e, may mga kalokohan din akong ginagawa," pagklaro ni Paolo.

Nagkatrabaho sila si Paolo ug Yen sa pelikulang A Far Away Land nga gihimo didto sa Faroe Islands sa Denmark niadtong 2021.

Gipalayas ni Pokwang

Napungot na gyud ang komedyana nga si Pokwang ug gibutyag na niya ang tinuod nga rason nganong nagbulag sila ni Lee O’Brian, ang amahan sa iyang five-year old daughter nga si Malia. Kini human may usa ka basher nga nipasangil niya nga “talakera” siya hinungdan nga gibiyaan siya ni Lee. Apan gitawag niya og “tanga” ang basher, kay ni Pokwang pa, nakamata lamang siya sa kamatuoran nga unom ka tuig na niya nga gibuhi si Lee, ug lima ka tuig kini nga walay sustento nga gihatag para sa ilang anak. Giklaro sab niya nga, wala siya biyai ni Lee, siya maoy nagpalayas niini. Ang maong pamahayag ni Pokwang, sukwahi sa iyang giingon kaniadto nga kugihan si Lee ug wala silay problema sa kwarta.

GL series nay an!

Bukas sila si Janella Salvador ug Jane de Leon nga momugna og GL series o girl love story, basta nindot lang gyud ang material. Maanindot matud pa nila kining gasa alang ngadto sa LGBTQ+ community. Gipangutana sila niini sanglit gawas sa mga maaksyon nilang eksena sa Darna isip Darna ug Valentina, nabantayan sab sa ilang fans nga aduna silay chemistry, hinungdan nga namugna ang “DarLentina” fandom o supporters. Giangkon sa duruha nga sa sinugdanan dili gyud sila suod, wala sila nag-away, apan kiwaw lang. Apan sa ngadto-ngadto nagkasuod gyud sila. Dako ang pasalamat sa duruha sa mainitong suporta nga gipauwan sa ilang fans ngadto sa naghinapos na nila nga serye sa ABS-CBN, ang labing bag-o, mao ang paghugop sa fans sa ilang mall show didto sa Bataan.

Mularga na sila

Nagsugod na ang taping sa Unbreak My Heart nga gipahigayon sa wala nila ibutyag nga location dinhi sa Pilipinas. Ang Unbreak My Heart mao ang unang collaboration sa GMA7 ug ABS-CBN, nga gikalipay sa kadaghanan sanglit gilauman nga mao kini nga teleserye ang mopapas sa “network war” tali sa duha ka mga higanteng TV networks. Sa nilabay nga adlaw, nakita nga nagbonding ang mga executives sa ABS-CBN ug GMA7 kauban ang mga bituon niining maong serye pinanguluhan nila ni Jodi Sta. Maria, Richard Yap, Joshua Garcia ug Gabbi Garcia. Gitakda na sila nga mulupad paingon sa Switzerland alang usab sa mga eksena nga adto mugnaon.

#DeePaTapos

Gumikan nianang maong hashtag nga gi-post ni Michelle Dee niining nakalabay nga mga adlaw, dako ang pagtuo sa pageant fans nga subli siya nga mosalmot sa Miss Universe Philippines pageant. First runner-up ni Celeste Cortesi si Michelle sa nilabay nga tuig. Sa February 5, pa ang deadline sa registration alang sa mga nagtinguha nga mosalmot sa MUP karong tuiga.