Ka sexy ba...

“Facebook saw it first,” maoy caption ni Chie Filomeno niining iyang hulagway nga iyang gi-upload sa iyang Instagram account niadtong Huwebes sa gabii. Kini kay ang maong hulagway, una niyang gi-upload sa FB page niya, niadto pang January 4, diin nakaangkon kini og 136 likes. Sa IG aduna kini 176,536 likes human lamang sa 19 hours.

Halinon ang ABS-CBN series

Showing sab ang TV series nga Viral Scandal didto sa 41 ka mga nasud sa Africa ilabi na sa Nigeria, Ghana, Seychelles, ug Ivory Coast. Bida niini sila si Charlie Dizon, Joshua Garcia, Dimples Romana, ug Jake Cuenca. Nahalin na sab ang ubang mga dekalidad nga teleserye sa ABS-CBN sama sa FPJ's Ang Probinsyano, Sino ang Maysala?: Mea Culpa, La Luna Sangre, Since I Found You, Ang sa Iyo ay Akin, ug The Legal Wife sa Africa; ang 2015 remake sa Pangako Sa 'Yo sa Latin America; The Blood Sisters sa overseas territories sa France; ug niining bag-o lang tulo sa primetime serye sa ABS-CBN nga naglakip sa  Marry Me, Marry You, On the Wings of Love, ug Halik nahalin sab didto sa sa Malaysia.

Isalida’g balik

Giklaro sa ABS-CBN ang balita nga matud pa gihunong sa ANTV Indonesia ang pagpasalida sa Darna didto gumikan kay nahasupak kini sa Muslim culture sa maong nasud. Suma pa sa Kapamilya Network dili kini tinuod. Ang tinuod nga rason mao nga mag-digital broadcast na ang ANTV, hinungdan nga gihunong lamang una ang pagpasalida sa Darna. Sa higayon nga makompleto na ang proseso gikan sa analog ngadto na sa digital TV, ipadayon ang pagpagawas sa Darna didto sa Indonesia pinaagi sa ANTV.