Mga eksena sa "Deleter" giatngan

CEBU, Philippines — Ang pelikula ni Nadine Lustre nga “Deleter” maoy unang proyekto ni Direk Mikhail Red sa Viva Films.

Dakong garbo alang kang Nadine nga makatrabaho ang dili basta-basta nga  direktor. Nasayran nga si Direk Mikhail ang naa sa likod sa pelikulang  “Birdshot” (Best Picture sa Asian Future category ug sa 2016 Tokyo International Film Festival) ug  “Dead Kids” (ang labing una nga Filipino Netflix original film).

Nagkanayon si Nadine nga taod-taod na gyud niya nga gipangandoy nga malakip sa usa ka proyekto nga modalit og laing putahe busa naghinam-hinam na gud siya sa mahimong resulta niini sa takilya. Gikalipay niya og maayo sa dihang gitanyag sa Viva ang pelikulang "Deleter" ngadto kaniya.

“Gusto ko yung kakabahan ako kapag nagsh-shoot ako,”  nagkanayon ang aktres. Gikatahong giatngan na og maayo ang mga eksena sa maong pelikula nga giingong makahadlok gyud.

Si Nadine maoy nidala sa kakter ni Lyra, usa ka content moderator nga na-trauma sa butang  nga iyang nasinati subay sa iyang trabaho. Nalakip pud sa "Deleter" sila si Louise Delos Reyes, McCoy De Leon,  ug Jeffrey Hidalgo.

Mao kini ang bugtong  horror entry sa 2022 Metro Manila Film Festival nga mosikad karong Disyembre 25, 2022.

Andrea isip Dyesebel?

Niulbo karon ang hungihong nga matud pa moumol og remake ang ABS-CBN sa pantaserye nga "Dyesebel".

Nitumaw usab ang chika nga si Andrea Brillantes maoy bida sa maong proyekto. Tak-om lang ang aktres kalabot sa maong taho nga nikatap karon. Una na nga nidala kaniadto isip Dyesebel mao sila si Marian Rivera ug Anne Curtis.

Charo nakighimamat sa letter senders

Nagkatapok sa niaging adlaw ang pinili nga  31 letter senders  sa nanamilit na nga programa  nga   Maalaala Mo Kaya kauban si Charo Santos ug ang maong kalihokan gitawag og  "MMK Grand Kumustahan".

Gipaambit sa  letter senders ang ilang mga kasinatian human gi-ere sa "MMK" ang istorya sa ilang kinabuhi. Pipila sa  mga episode nga nahisgotan atol sa maong kalihokan mao ang  "Garapon" nga gibidahan nila ni Carlo Aquino ug Jaclyn Jose, "Regalo" nila ni  Vilma Santos-Recto ug Maja Salvador, "Courageous Catie" nila ni Shaina Magdayao ug JC de Vera, "Balsa" ni Zanjoe Marudo, ug uban pa.

Nanamilit na ang MMK sa kahanginan human sa tulo ka dekada nga gisaw-an sa mga Pinoy.

Wala mahadlok

Gitataw ni Maricel Soriano nga wala siya mahadlok nga mahupas ang iyang popularidad. Suma pa sa aktres nga gipangandaman na niya daan ang maong butang. "Kasi from the start, bata pa ako, alam ko na iyan. Sinabi na nila sa akin. Sabi nga nila, lahat ng bagay may katapusan… Kaya dapat laging handa. Dapat girl scout ka, laging handa,” suma pa sa Diamond Star.

Mirespeto gihapon

Gitataw ni Matet de Leon nga magpabilin ang iyang pagrespeto ug paghigugma ngadto sa iyang inahan nga si Nora Aunor bisan pa man nga duna sila'y gamay nga panagbikil niini. Kahinumdoman nga wala mahimout si Matet kang  Nora human  kini nakig-kompetensya sa negosyo niya nga tinapa.

Nataypan sa viewers

Dili na kapugngan ang pagsaka sa popularidad  sa "FiLay" tandem nila ni  Barbie Forteza ug David Licauco sa teleseryeng "Maria Clara at Ibarra"  sa GMA-7.  Nabatyagan sa viewers ang kusog nila nga chemistry.

Laban lang Albie!

Gitataw ni  Albie Casiño nga wala gyud nasulod sa iyang hunahuna nga moundang sa showbiz bisan kapila na ka higayon nga nahinay og kalit ang iyang career. Sa pagka-karon, aktibo na si Albie sa pag-arte.

Nag-sorry kang Tuesday

Nangayo na og pasaylo ang road manager sa magka-loveteam nga giingong wala managad ngadto sa komedyanteng aktres nga si Tuesday Vargas. Giingong nahitabo kini sa usa ka corporate event.“Una ay dine deny pa na merong isnaban na naganap, then when I relayed what happened … she said ‘ay opo pasensya na po kayo kasi nagmamadali po talaga kami," suma pa ni Tuesday.

NET25 Star Center

Gipaabot ang anam-anam nga pagsulbong sa mga artista sa kaugalingon talent center sa NET25. Ang maong talent management arm kay gitawah og  NET25 Star Center. Nangulo sa maong departamento mao ang aktor nga si  Eric Quizon. 

Miyembro sa CCDC

Si Sam Costanilla gitudlo ni Cebu City Mayor Michael  Rama isip usa sa mga miyembro  sa bag-ong giumol nga Cebuano Cinema Development Council (CCDC). Si Costanilla ug ang iyang 818 Films padayon nga nanggama og mga mugbong lilas (short films) nga makita sa YouTube ug Facebook.