Taga Cebu ang pambato sa Pilpinas

Miss Teen Model Universe

Ang 16 anyos nga taga Minglanilla, Cebu nga si Sarah Nicole Filtness maoy representante sa Pilipinas sa umaabot nga Miss Teen Model Universe nga pagahimoon didto sa Madrid, Spain karong Disyembre 16-22, 2022.

Atol sa press conference  sa miaging adlaw , gitataw ni Sarah nga dakong garbo alang kaniya nga modala sa tingog sa nasud sa usa ka international pageant.

Dili na bag-o kang Sarah  ang pagsalmot og international pageant  sanglit nakasalmot  na siya kaniadto sa Miss Pre-Teen Universe 2019  ug siya ang nahimong mananaog niini.Mapasalamaton si Sarah sa iyang inahan nga nihatag og lapad nga suporta sa pagsalmot niya og mga indigay ug mao kini ang nagsilbi niya nga inspirasyon.

Matud pa niya nga buhaton niya ang kutob sa iyang mahimo aron malangkat ang korona sa Miss Teen Model Universe karong tuiga ug maghatag kusog kaniya ang mainitong suporta sa mga Pinoy.

Ipasiatab gyud niya sa ubang lugar kun unsa kanindot ang Pilipinas. Samtang ang usa ka opisyal sa  Lungsod sa  Minglanilla nga si Konsehal  Jay-R dela Calzada nibutyag nga mopaambit og pinansyal nga suporta ngadto kang Sarah ang ilang lokal nga kagamhanan.

Matud pa sa konsehal nga  bisan unsa pa ang mahimong resulta, dakong garbo alang  sa mga  taga Minglanilla  ang pagsalmot ni Sarah sa  usa ka international pageant.