Casili jins misidlak sa Alegado taekwondo

CEBU, Philippines — Ang mga pambatong jins sa Barangay Casili misidlak nga labing hayag human mihakot og siyam ka bulawang medalya sa 1st Mayor Teresa "Nene" P. Alegado Cup Taekwondo Invitational Tournament didto sa Aboitiz gym sa Barangay Casili, Consolacion ning bag-ohay pa lamang.

Sa secondary boys division, ang Casili mibulsa og lima ka golds kortesiya nilang lightweight Janeya Shiloh Reloj, finweight Cyjian Justinemo, bantamweight Chency Archer Garcia, featherweight Christian Joseph Esturom, ug lightweight Michael Arellano.

Sila si flyweight Chrishna Marielle Areja ug bantamweight Rose Marie Areja midugang og duha ka golds sa Casili sa secondary girls action.

Namina sa Casili ang lain nilang duha ka bulawan sa elementary category luyo sa paningkamot nilang Faith Harmony Gonzaga (Player 4, 144-152cm) ug Rex Harvey Talisic (Player 2, 128-136cm).   

Duna pay pipila ka mga garbong talento sa Consolacion ang nanghawod sa tagsa-tagsa nila ka mga kategoriya sa usa ka adlaw nga torneyo nga gipadagan nilang Jessie Lagudas ug Fritchel Palermo Malicse. Kini mao sila si Chlyde Christoff Pepito sa Poblacion Oriental (Player 1, 120-128cm), flyweight Kristoffer Rey Pono sa Nangka, welterweight Lloyd Chavez ug Philip Genares (Group C, 55 kgs. below) sa Pulpogan, finweight Jade kyla Mangilaya sa Garing, ug Reneboy Romagos of Lamac (Group B, 60 kgs. below).

Sa laing bahin, ang mga atleta gikan sa lungsod sa Ronda habagatang bahin sa Sugbo mihimo sab og kasikas uban ang upat ka golds nga gikabkab nilang Kyle Angelo (Player 3, 136-144cm), Ma. Nina Abiar (Player 1, 120-128cm), Gia Balatera (Player 3, 136-144cm), ug  Jay Ann Baunset (Player 2, 128-136cm).

Wala sab hinoon magpabitin ang Compostela ug Dumanjug nga mibira og tagurha ka golds. Sila si Luke Ethan Parawan (Player 4, 144-152cm) ug featherweight Lucila Rose Francisco milabni og golds alang sa Compostela, samtang sila si John Kurt Rhuzel Panerio ug Zyra Belocura mihatag og duha ka golds sa Dumanjug human sila nanghawod sa open weight.

Si Mary Kylle Tacluyan sa Danao kumpleto sa listahan sa mga gold medalists human iyang gidominar ang senior girls division.