Pormal na nga gipalugwa ang official trailer sa Flower of Evil Pinoy version nga gama sa ABS-CBN, diin bida sila si Piolo Pascual ug Lovi Poe. Human sa watch party, diin ang trailer gipalugwa sa tanang platforms sa ABS-CBN, gipasigarbo og maayo nila ni Piolo ug Lovi ang ilang proyekto. Matud ni Piolo, lahi ang dagan sa istorya sa ilang version ug nakamugna gyud sila og maanindot nga salida. Samtang si Lovi niingon nga adunay “pusong Pinoy” ang ilang version. Sa June 23, na pinaagi sa streaming service platform, Viu, mulugwa ang maong serye diin makita kini sa 16 ka mga nasud sa Asia, Middle East, ug South Africa. Makita pud kini dinhi sa Pilipinas duha ka adlaw human sa international premiere, pinaagi sa Kapamilya Online Live, Kapamilya Channel, ug A2Z.
Naunsa na kaha?
Pangutana pa karon unsa nay nahitabo kang Kit Thompson human sa kontrobersiya nga nalambigitan niini diin gikulata matud pa niya ang iyang uyab nga si Ana Jalandoni niadtong Marso. Ang kumpirmado, gipulihan na gyud si Kit ni JC de Vera, sa Pinoy adaptation sa ABS-CBN sa Korean hit series Flower of Evil diin sila si Piolo Pascual ug Lovi Poe ang mga bida. Gihulipan sab siya ni Joseph Marco sa usa ka digital series para sa usa ka supermarket. Kini mao ang “Ang Babae Sa Likod ng Face Mask”, diin si Herlene Budol o Hipon Girl ang bida, ug niadtong March 26, unta mulugwa ang pilot episode kun wala ba niulbo ang isyu tali ni Kit ug Ana.