Supportive nga gf

CEBU, Philippines — Nakasabot ra ang aktres nga si Bianca Manalo sa ka-busy sa iyang hinigugma nga si Senador Sherwin "Win" Gatchalian ug wala kini nahimong babag sa nagkalig-on nila nga relasyon.

Sa pagtikang ni Sen. Gatchalian  dinhi sa Siyudad sa Sugbo sa miaging adlaw, gibutyag niya nga masinabtanon kaayo si Bianca sa iyang sitwasyon ug supportive kaayo kini sa iyang political career. "Supportive naman siya,  at naintindihan niya ang mga ginagawa ko," matud pa niya.

Suma pa sa senador nga dili gyud malikayan nga dunay mga higayon nga dili sila magkakita ni Bianca sulod sa pipila ka adlaw tungod sa iyang trabaho ilabi na karon nga na-busy siya sa mga konsultasyon alang sa mahimo niya nga daganan sa umaabot nga piniliay karong 2022.

Kahinumdoman nga dinhi sa Siyudad sa Sugbo gianunsyo ni Gatchalian nga bukas siya sa posibilidad nga modagan pagka-bise presidente sa umaabot nga eleksyon.

"Lockdown" pasok sa Asian Film Festival

Nalakip ang Pinoy film nga "Lockdown" sa mga motigi sa Asian Film Festival didto sa Barcelona  karong Oktubre.

Ang aktor nga si Paolo Gumabao maoy bida sa maong pelikula

Suma pa sa executive  producer sa maong pelikula nga si Jojo Baron sa For the Love of Art Film  nga dakong garbo nga malakip ang ilang produkto sa usa ka film festival sa laing nasud.

Nasayran nga si Joel Lamangan ang direktor sa maong pelikula nga naghisgot sa     mga lalaki nga napugos sa pagsulod og cybersex aron makahaw-as sa kalisod nga nahatag sa pandemya.

Ipasalida na usab ang Lockdown sugod karong Hulyo 23 pinaagi sa KTX.ph, Upstream.ph, RAD (iamrad.app), ug WeTV.

Nalakip sa "Lockdown"  sila si Alan Paule, Max Eigenmann, Ruby Ruiz, Jess Evardone, Paul Jake Paule, Angellie Sanoy ug Jim Pebanco.

Digital concert ni Vice gipistahan

Imbes duha ra ka oras ang target, nahimong tulo ka oras ang dagan sa digital concert ni Vice Ganda niadtong Sabado sa gabii nga nag-ulohan og Gandemic: The VG-Tal Concert.

Nagsugod kini og alas 9 sa gabii ug nahuman og alas 12 sa tungang gabii.

Napuno sa hudyaka ang maong concert gumikan sa hugyaw nga mga komedya ni Vice.

Trending niadtong gabhiona sa social media ang hashtag nga #GANDEMIC .

Naka-duet usab ni Vice sa iyang digital concert mao ang iyang soud nga higala nga si Anne Curtis.

Nataypan ni Alexa

Nakauyon ra si Alexa Ilacad sa leading man niya sa drama series nga Init Sa Magdamag nga si Gab Lagman. Ganahan si Alexa nga makauban niya og balik si Gab sa umaabot niya nga projects.

"Kapamilya Forever"

Gipalugwa na ang bag-ong music video sa awit nga  “Kapamilya Forever” kun diin makita pud ang mga bag-ong artista sa ABS-CBN. Gi-highlight usab ang mga artista nga wala gyud nibiya sa Kapamilya Network.

Awhag ni Vice

Usa si Vice Ganda sa mga artista nga nanawagan sa publiko nga magparehistro aron makabotar sa umaabot nga piniliay karong 2022. Matud pa niya nga importante kaayo ang pagbotar sanglit mao kini ang higayon nga makapili ang mga tawo sa gusto nila nga palingkoron sa gobyerno.

“Kaya sa mga pwede nang bumoto, magparehistro po kayo. Napakahalaga po niyan,” suma pa ni Vice.

Kever sa politika

Kanunay gyud  makadawat si   Luis Manzano  og mga pangutana kun mosulod ba siya sa politika.  Matud pa sa TV host nga wala gyud masulod sa iyang hunahuna ang maong butang.

Suwayan and action-drama

Ipakita nila ni  Jerald Napoles ug Kim Molina ang uban nila nga estilo sa pag-arte sa pelikulang  "Ikaw at Ako at ang Ending". Suma pa nga action-drama ang konsepto sa maong pelikula nga ipasalida sa VivaMax karong August 13, 2021.

Mapasalamaton sa GMA

Usa si David Licauco sa mga artistang nag-renew og kontrata sa  GMA Artist Center sa miaging adlaw. Mapasalamaton ang aktor sa iyang mother network sa pagsalig niini sa iyang talento sa pag-arte.