Humble, Argao!

Maayong adlaw'ng Biyernes mga suki namong readers sa Banat News!  Sa ako nang gisaad isuroy na sab mo nako sa laing relaxing nga lugar sa Sugbo. Dali na ug kuyogi ko ninyo, atong bisitahon karong adlawa ang Argao!

Niadtong reporter pako sa TV5 Cebu. Makapila gyud kahigayon ko nga magbalikan niining maong lugar sanglit ako mang i-cover ang kapistahan dinhi ug mga dagkong panghitabo sa maong lungsod.

Sa panahong masayud ko nga ako ang reporter nga i -send sa Argao alang sa usa ka coverage, dakong kalipay gyud ang akong pagabation tungod kay alang nako, malipay gyud kong mag tan-aw sa mga karaang istraktura, mga panimalay, kabisera ug plaza sa Argao.

Ako man gyud ang tawo nga mahiligong mohigugma sa mga karaang talan-awon.

Di gyud nako sipyaton ang pagsuroy sa ilang plaza sanglit ato mang maaninaw dinhi ang kaharuhay sa kinabuhi pun- an pa nga doul lang kini sa kabaybayunan maong fresh air gyud ang atong malanghap kanunay kung kita maglingkod- lingkod dinhi.

Atong nasayran nga ang  lungsod sa  Argao  maoy usa sa mga labing karaang lungsod sa nasud.

Segurado usab nga mangangha ka sa kanindot sa ilang simbahan ug mura gyud ka og naa sa karaang panahon.

Usa kini ka lungsod nga naninguha sa pagkab-ot sa mga modernong kabag-ohan apan nagpabilin gihapon ang hiyas dinhi sa karaang kapanahonan.

Mao kini ang pinuy-anan sa mga tawong  mapasigarbuhon sa mga nakalabay'ng kasaysayan sa ilang lugar.

Abunda sab kini sa natural resources ug mga home-grown products. Labaw sa tanan daghang mga prominenting Sugbuanon nga naila sa tibuok nasud ang nagikan dinhi sama nilang Cerge Remonde, usa ka magsisibya ug press secretary  sa panahon ni kanhi  Presidente Gloria Arroyo, kanhi Supreme Court Chief Justice Hilario Davide ug ang anak niining kanhi gobernador sa Sugbo nga si Junjun Davide.

Dinhi sab nagikan ug namugna ang hablon industry. Usa ka produkto nga maoy pagagamiton sa pagbuhat og clothing material.

Gibansagan ang Argao isip usa sa labing interisting places sa probinsya sa Sugbo tungod sa ilang mga public stone buildings nga giaptan og tiles nga maoy pahigayonan nila sa paghimo kaniadto og mga bricks ug mga tiles nga sa mga nakalabay'ng panahon.

Gani pipila niining maong mga Argaoanon-bricks ug tiles maoy gigamit sa pagdesinyo sa mga dagkong mansyon sa Sugbo nga gipanag-iya sa mga elitista.

Sayon ra kaayo ang pagtikang dinhing dapita,  kung gikan ka sa dakbayan sa Sugbo,  moadto lang ka'g South Bus terminal, mosakay ka'g bus ug sa duha ka oras kapin nga pagbiyahe moabot na ka sa maong lungsod.

Ang pilite niini  P95.00 sa regular nga  bus ug P110.00 kun ganahan ka air-conditioned bus. Unsa pay inyong gipaabot dali na, biyahe na ug sinatia ang kaanindot sa Argao.