Amerikano patay sa aksidente

CEBU, Philippines — Namatay sa  tambalanan ang usa ka 66-anyos nga Amerikano nga naangol human naaksidente ang iyang gisakyang motorsiklo sa Barangay Poblacion sa Lungsod  sa Carmen niadtong  Sabado sa hapon.

Nasuta sa mga doktor nga si Albert Kull naaksidente ug dali nga gihatod ngadto sa  Danao City Hospital tungod  sa mga pangus  ug bun-og  nga naangkon bunga sa pagkalamba niini samtang nagmaneho sa iyang motor dihang kini ni-overtake sa nag-unang motor. Ang drayber sa laing motorsiklo giila nga si Vicente Ramos Jr.

Si  Police Patrolman Francisco Domasig  sa  Carmen Police Station miingon nga si  Ramos nakaangkon sab og gamay nga pangus ug bun-og sa lawas. Matud  pa ni  Domasig nga nigawas sab sa liquor test kang Kull nga positibo kining nakainom og ilimnong makahubog.

Si  Domasig miingon nga dihang gitambalan sa iyang mga pangus ug bun-og  si Kull kalit kining giatake sa sakit sa kasingkasing maong dali kining gibalhin sa tambalanan sa Dakbayan  sa Sugbo  apan wala na kini makaabot nga buhi sa tambalanan.

Wala gitanggong si Ramos tungod kay ilang gituohan nga minor accident ra ang nahitabo apan nakurat nalang sila pagkasayod nga namatay ang maong langyaw sa tambalanan. Wa pa matino kun kasohan si Ramos bahin niini.  IBM (BANATNEWS)