Ohlala Kinatarcan!

Maayong adlaw’ng Byernes mga suki namong readers sa Banat News! Laing Biyernes  na usab ang niabot, buot ipasabut, laing lugar na sab ang atung laagon!

Kahibalo ko nga  nagpanikad na gayud nga maligo sa dagat tungod sa naglagiting kainit sa panahon.

Gusto ba ninyung masud -ong ang usa sa mga lugar nga wa pa kaayu gidagsa sa mga turista apan adunay maanindot kaayu nga kadagatan ug mga talan- awon?

Dali na, tara na, biyahe na, tikang ta sa  Kinatarcan Island! Ang Kinatarcan maoy usa ka dakong isla nga sakop sa Santa Fe,  Isla sa Bantayan,Cebu.

Duol sab kini sa Daanbantayan.  Pwede kining masud-ong sa duha ka paagi.

Kung gikan ka sa Siyudad sa Sugbo, mosakay lang ka og regular nga  bus sa North Bus Terminal magpahatud ka sa Daan Bantayan kung diin ang imong pletehan, mokabat lang og P165.00.

Kung anaa naka sa Daan Bantayan, moadtu lang ka sa ilang port kung diin didtu naka standby ang mga pumpboat nga mohatud kanimo sa Kinatarcan ug moplete lang ka’g P50.00, masinati na nimo ang kaanindot sa maong isla.

Samtang kung nagbakasyon ka na sa Santa Fe ug gusto nimong  mobisita sa Kinatarcan , pwede ra kaayo kang mosakay og pampasaheroang pumpboat paingun sa Kinatarcan ug moplete lamang ka’g P70.00.

Daghan kaayu kang pwedeng i-enjoy sa maong lugar sama na lamang sa nabantug nilang laaw lagoon ug kung unsa kaanindot ang mga white sand beaches sa Santa Fe, mao sab ang Kinatarcan.

Gihulagway sa mga  Santafehanon nga ang Kinatarcan matud pa maoy hitsura ug maoy kahimtang sa Santa Fe niadtong  traynta ka tuig ang nakalabay.

Sanglit sayud man ta nga progressive na kaayu ang Santa Fe tungod kay nabantug naman gyud kini tibuok nasud isip usa sa mga lugar sa Pilipinas nga adunay maanindot kaayung kadagatan ug kabaybayunan, hinungdan nga padayun kining gidagsa sa mga turistang lokal ug langyaw.

Habal habal ang nag unang means of transportation dinhi, perfect sab kaayu ang maong lugar sa mga lab-as kaayung seafoods tungod kay matag adlaw mang managat ang mga mangingisda dinhi .

Aduna pod ni silay mga dagkong cliff nga pwede ninyung ka ambak -ambakan kung maligo na mo sa dagat.

Sa kanunay, magpasalamatun ta sa atung Labaw’ng Makagagahum sa pagtugyan niya kanatu og mga maanindut nga lugar nga sayun ra kaayo natong sud-ungon.

Happy Flyday Friday mga kaigsuonan!