“Pa- burger naman diyan”. Mao kini ang linya sa mga tawong mamarayeg kaninyo og lami nga pagkaon ilabi na ang burger.
Ganahan gyud ta og pure beef gyud ang ihaplag sa burger bun gumikan kay segurado gyud nga lami kini nga kan-on.
Suwayi kaha ang pagama niini, kung duna mo’y igong higayon, mahimo mo nga magluto sa inyong panimalay uban sa inyong pamilya o ba kaha mga higala.
Kalingawi ang pagbuhat og burger patty, ug ipalaman kini sa pan, busa siguradong mabusog gyud mo sa inyong food trip.
Makadaginot gyud kung kamo ang mobuhat sa patty aron maseguro nga sakto gyud ang gisagol niini ug gamay ra pud ang inyong magasto. Gusto kita og pure beef busa dili na kinahanglan nga magbutang og harina gumikan kay mao kini ang makapatab-ang sa lasa kung mobutang ka niini. Sayon ra mga besh, magluto na ta!.
Mga sagol:
1 kilo ginaling nga karneng
baka
1 itlog (large)
Pepper
Asin
Pamaagi:
1. Sa lawom nga sudlanan nga dunay gamay nga init tubig, isagol ang karne ug itlog.
2. Ukaya og maayo hangtud nga molapot siya.
3. Ibutang dayon ang asin ug pepper ug ukaya na pud og balik aron molami og samot ang timpla.
4. Mahimo nga mogamit og hulmahan ug puwede ra pud nimo kamoton aron imo kini nga pormahon. Kung duna kay ibutang nga seasoning, depende ra nimo basta pasok kini sa imong panlasa.
5. Kung nahulma na, lutuon dayon kini sa nagbukal nga mantika. Inigkaluto, ihaplak dayon kini sa burger bun o ba kaha sa sliced bread.