CEBU, Philippines — Ang career sa usa ka artista, sama sa roller coaster—mosaka, mopaubos, unya mosaka na pud. Mao kini ang senaryo sa mga naagian ni Roxanne Barcelo nga taod-taod na nga nag-enjoy sa iyang showbiz career.
Nahinabi si Roxanne sa pipila ka mga sakop sa Cebu Entertainment Group sa dihang nag-promote kini sa pelikulang I Found My Heart In Sante Fe kun diin leading man niya ang iyang boyfriend nga si Will Devaughn.
Siya ang artista nga wala gyud mo-surrender bisan pa man nga dunay mga higayon nga nagtakilid ang iyang career.
Nasayran nga makapila na siya nga nag-usab sa iyang imahe sa showbiz sanglit nag-agi pud siya og lain-laing manager.
“Noong pinasok ko ang showbiz, hinanda ko naman ang sarili ko sa mga bagay na puwedeng mangyari sa akin. Sa showbiz kasi, dapat kilala mo ang sarili mo, “ matud pa niya.
Si Roxanne o Anne Roxanne “Roxie” Jordan Barcelo sa tinuod nga kinabuhi, natawo sa Virginia, United States. Nakatungha siya sa School Of The Holy Spirit and Miriam College.
Nagdako siya nga mapaubsanon ug grabe usab ka mapinanggaon sa mga tawo nga nagpalibot kaniya ilabi na ang iyang pamilya.
“Sobrang close talaga ako sa family ko, pinalaki kasi kami na dapat marunong ka gumalang sa ibang tawo, yan ang tinuro ng aking mga magulang,”dugang pa niya.
Nakasalmot na kaniadto sa reality search nga “Pinoy Big Brother: Celebrity Edition,”niadtong 2006. Sa wala pa siya nisalmot sa maong show, ilado na daan si Roxanne .
“Noon bata pa ako, gusto ko talaga mag-perform sa harap ng mga tao,” hirit pa niya.
Nagsugod ang iyang karera pinaagi sa modeling ug nakalugwa na sa pipila ka TV advertisements.
Pagsugod sa career
Sa edad nga 13, nagbase na dinhi sa Pilipinas ang iyang pamilya busa nakahigayon gyud siya sa pagsalmot sa Metropop Song Festival sa GMA. Human sa paglugwa niya sa maong programa, gisudlan niya ang acting world pinaagi sa “Click” , ang youth- oriented show sa GMA 7.
“Wala akong masyadong background sa acting, kaya malaking challenge para sa akin na nakasali sa Click, malaki siyang break sa career ko,” matud pa niya.
Nakalugwa na pud siya sa TV drama series nga “Kung Alam Mo Lang” ug nakabaton siya og album nga “Roxie.” Nalakip usab siya sa “Mudraska”, ang entry sa 2006 Cinemalaya Film Festival.
Naapil usab siya sa fantasy series nga “Darna,” niadtong 2009 nga gibidahan sa iyang bestfriend nga si Marian Rivera. Ang ubang programa niya sa GMA naglangkob sa “First Time” ug “Art Angel,”
Dream role
Nasuwayan na niya ang pagkanta ug pag-arte sa mga serye ug nakapabaid niya kini sa iyang pagka-artista. Pangandoy usab niya nga makasuway og musical ug action projects.
“Kahit sinong artista, gusto natin masubokan yung iba’t-ibang projects , marami tayong natutunan sa ilang taon natin sa industriyang ito , may mga bagay talaga na gusto nating masubukan. Masusurprisa ka dahil nakayanan, mo,” matud pa ni Roxanne.
Kontento siya sa dagan sa iyang career karon, ug resulta kini sa taas niya nga pasensya bisan pa man nga duna’y mga higayon nga namingaw og kalit ang iyang career.
Lovelife
Sulod na sa kapin sa upat ka tuig, nagpungasi gyud ang relasyon nila ni Will gumikan sa ilang respeto sa usa’g-usa ug kanunay usab nila ipadaplin ang ilang mga garbo sa higayon nga duna sila’y gamay nga panaglalis.
“Yung mga selos-selos , wala sa amin yan, may tiwala kami sa isa’t-isa. Kung nandyan ang respeto ,magiging strong ang isang relasyon,” dugang pa sa aktres.
Wala pa sab sa ilang huna-huna nga magpakasal gumikan kay na-busy pa sila sa ilang mga career. Matud pa niya nga wala’y angayan nga dalian sanglit naa ra nagpabilin ang tinud-anay nila nga gugma sa usa’g-usa.
Wildflower
Usa sa rason nga sikat ang iyang pangalan karong panahona mao ang iyang partisipasyon sa hit series sa ABS-CBN nga Wildflower.
Aminado siya nga nakatabang gyud kini sa iyang career gumikan kay sikat kaayo ang maong serye.
Nasayran nga makapila na nga higayon nga na-extend ang maong show gumikan sa kataas sa ratings niini.
“Malaking bagay na nakapasok ako sa Wildflower, hindi ko ini-expect na mapansin ng mga tao yung karakter ko. Sobrang nag-enjoy ako sa trabaho ko, dahil ito naman talaga ang gusto ko, “ pagtapos pa niya. (BANAT NEWS)