Fried Mashed Potato Balls

Mahiligon ba mo mokaon og patatas? Puwes, atong suwayan ang laing putahe nga ginama gihapon sa patatas.

Sa nakuha nako nga impormasyon sa www.idahopotato.com, duna ‘y hugyaw recipe nga mahimo gamit lang ang duha ka patatas ug mga baratuhon lang nga mga sagol.

Gawas nga barato lang ang patatas, aduna usab kini nagpahipi nga mga nutrina, bitamina ug minerals nga maoy makahatag og maayong benepisyo sa atong lawas sama sa musunod:

• Makapadungag og timbang sa mga gamay og lawas

• Makapadali sa pagpahilis sa atong kinaon

• Makapanindot sa atong panit

• Makapaayo sa mga namaksit ug nagdugo nga ngabil ug lagos

• Makapalikay sa sakit sa rayuma, high blood pressure, cancer, sakit sa kasingkasing

• Makapaayo sa mga nakasinati og diarrhea

• Makalikay sa pagporma sa mga kidney stones

Mao nga mogama na kita og fried mashed potato aron mas healthy living na gyud kita.

Mga sagol:

• 2 ka patatas

• Asin

• Paminta

• Butter

• 4 ka egg yolk

• Harina

• Bread crumbs

• Mantika

Ang proseso:

1. Pabukalan ang duha ka patatas sulod sa 30 minutos.

2. Kinahanglan nga humok na kini sa dili pa kini kuhaon.

3. Ipahubas una kini sa salaan sa pipila lang ka minutos.

4. Panitan kini ug hiwaon. (Ang paghiwa, sakto lang sab nga mura na kini og kadako og bola sa jackstone)

5. Ibutang ang hiniwa nga patatas sa usa ka panaksan ug idungag og butang ang butter.

6. Butangan kini og gamay nga asin.

7. Butangan usab kini og gamay nga paminta aron pampahalang. Mamahimo usab nga dili lang kini butangan (depende sa gusto nimo nga lasa).

8. Dugmokon na ang patatas ug ang butter gamit ang tinidor ug isagol.

9. Human sa pagdugmok, ibutang na dayon ang duha  ka egg yolk ug isagol.

10. Human sa pagsagol, tabunan ang panaksan ug ibutang kini sa refrigerator sulod sa duha ka oras.

11. Human sa duha ka oras nga pagpabugnaw, kuhaon na kini og magsugod na og paghulma nga mura og bola.

12. Ibubod ang hinulma nga patatas sa harina, binatil nga itlog ug breadcrumbs.

13. Kinahanglan nga maputos gyud ang patatas sa mga gibubod nga sagol.

14. Ilunod na kini sa daghan nga mantika sa kaha ug prituhon. Dili kini paigon.

15. Human og prito, ibutang na kini sa plato nga adunay limpyo nga tissue aron dili kini mantikaon inigkaon.

16. Human og luto ug pagpauga, pwede na kini kan-on.