CEBU, Philippines - Madayon ang paglugwa ni Maine Mendoza isip special guest ugma sa Sunday Pinasaya bisan pa man sa mga isyu nga nasugatan sa direktor sa maong show nga si Rich Ilustre. Kahinumduman nga nangayo og sorry si Direk Rich ngadto sa AlDub Nation human siya giatake niini gumikan sa iyang komedya nga uyab sila si Alden Richards ug Julie Anne San Jose nga nakapasuko sa fans ni Maine.
Espesyal gihapon ang tinagdan
Gihimakak ni KC Concepcion ang report nga nagbalik sila ni Paulo Avelino. Giklaro sa aktres nga duna gihapon sila’y espesyal nga koneksyon ni Paulo isip maghigala ug mapasalamaton siya sa aktor gumikan kay padayon kini nga nagpangga kaniya.
Kaduha molugwa
Kaduha matan-awan si Tonton Gutierrez matag gabii sa ABS-CBN gumikan kay gawas sa seryeng You’re my Home , nalakip usab siya sa And I Love You So .
Naunsa na?
Gawas kang Myrtle Sarossa , wala na’y kisaw ang , ang ubang mga sakop sa Star Magic Angels nga sila si Aiko Climaco, Franchesca Floriendo, Jed Montero, Hanna Ladesma, Karen Reyes, Shey Bustamante , Loren Burgos ug Yana Asistio. Bag-ohay lang gipaila ang maong grupo apan kalit lang kini nahilom.
Blow By Blow
Hatagan og show sa TV5 si Manny Pacquiao karong 2016 ug kini nag-ulohan og Blow By Blow. Wala pa matino kung kinsa ang co-host ni Manny sa maong programa.
Paliton sa HK
Gidungog nga Hongkong paliton nila ni Pauleen Luna ug Vic Sotto ang sapatos nga gamiton nila sa ilang kasal. Nanglarga ang duha sa maong dapit niadtong Huwebes.
P26M ang gasto
Ang Quantum Films nakagasto og P26-M sa pelikulang Walang Forever nga gibidahan nila ni Jennylym Mercado ug Jericho Rosales. Sila si Jen ug Echo mismo maoy nagkanta sa theme song sa maong pelikula.
Camille sayo nangandam
Karong 2017 pa ang kasal ni Camille Prats ngadto sa iyang boyfriend nga si VJ Yambao apan nagsugod na ang preparasyon niini. Nakigtigom na si Camille sa iyang wedding coordinator sa miaging adlaw. Si Patricia Santos maoy gipili niya nga designer.
Libre ang serbisyo
Produkto diay sa Far Eastern University ang host sa Umagang Kay Ganda nga si Jorge Cariño busa wala siya nangayo og talent fee sa victory party Tamaraws men’s basketball team. Ang FEU maoy grand champion sa basketball division sa UAAP. (Sanden J. Anadia)