Hugyawnatic

Dear Banat News Hugyaw,

Nalipay ko kay Lunes napud, ug makabasa napud ko sa giatngan nako permi nga  part sa Banat News Hugyaw, ang Love Story.

Ako si Robin, 29 anyos ug nagtrabaho isip call center agent ug nagpuyo ko ron sa  Labangon , Cebu City.

Lima ka buwan nako nga single, ug hangtud karon dili pa andam akong kasing-kasing nga mahigugma og balik.

Ako na lang isaysay ang experience nako sa katapusan nako nga nauyab, siya si Clinna,  27 anyos  ug taga Capitol Site, Cebu City.

Nagkaila mi niya kay gitupo siya sa akong kaila, kay duna ma’y time nga  nagka-jam mi og laag sa among common friend diha sa Banawa, Guadalupe Cebu City.

Pag-una wala gyud nagpadala og tupo, kay dili ko ganahan nga basin mapugos ra ko ba, pero nagkadugay murag naganahan naman hinoun ko niya.

Nakabantay ko ni Clinna, kay mahinhin siya nga girl, hilomon kaayo   ug makadungog ra ka sa iyang tingog kung duna ka’y pangutana niya, haha. Maong ako gyud ang nangita og paagi  nga mag-istorya mi ug ako gyud permi ang  mo-open og topic.

Sa pagsige namo og istorya, na-develop na gyud ko og maayo, kay grabe siya kabuotan,  ug samot ko nga naganahan niya kay relihiyoso siya nga pagkatawo.

Dili na maantos akong feelings, ug nipadayag na gyud ko sa akong gugma kaniya ug grabe akong kalipay kay gisugot ko niya.

Na-develop na pud diay siya nako kay grabe daw ko ka boutan nga medyo sipat gamay, mao na ang iyang paghulagway nako.

Niana pud siya nga daghan ang lalaki ang dili makadiskarte kaniya kay masaypan man gyud siya nga istrikta tungod sa iyang kahilomon.

Dili paghambog , ang hitsura ni Clinna sama sa dagway ni Michelle Madrigal  maong suwerte kay ko atu, kay nakauyab ko og boutan , unya morena pa gyud nga maoy type nako.

Milungtad og duha ka tuig kapin ang among relasyon, nahibulong na lang ko ni Clinna kay kanunay siya moana nga duna daw siya iportante nga isulti nako.

Apan sa higayon nga mangutana ko kung unsa man, moana man siya og ,” Ay unya na lang uy, masakitan ko og samot.”

Nabalaka ko sa iyang gisulti, busa  ako gyud siya nga nakumbinser sa kung unsa man gyud , apan murag nahugno ang akong kalibutan sa iyang gisulti. Wala ko kasabot, kalit-kalit gyud kaayo, wala ko magdahom nga  sa kahapsay sa among relasyon kalit lang maputol.

Naghilak  si Clinna nga   niingon kanako nga magbuwag na mi kay idayon na gyud niya ang iyang plano nga mag-madre .

Gisekreto diay niya kaniadto nga duna siya’y plano nga mag-madre  ug nadasig siya sa pagsulod niini gumikan kay luag kaayo ang iyang pamati nga moalagad ngadto sa Ginoo.  Mao diay nga never gyud ko nakakita kang Clinna nga mosul-ob og sinina nga sexy.

Naghilak ko nga nihangyo kaniya nga ako lang unta ang iyang pilion, pero tibuok na gyud daw ang iyang hukom. Nagtoo ko nga sa  pelikula o sa TV series ra na mahitabo,  pero duna pud diay ing-ana sa tinuod nga kinabuhi.   Moangkon ko, unom ka buwan ko nga  nag-antos sa kamingaw kaniya, hangtud  nga naka-move on ko. Sakit kaayo akong na-experience, seguro dili gyud kami alang sa usag-usa. Mo-request lang ko og lyrics sa  Before I Let You Go by Freestyle.

Hello Mart! Thank you so much sa imong LOVE STORY! Paabuta ugma puhon ang imong request.

Dear HUGYAWnatics, aduna ba kamo'y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story

C/o Banat News

Corner V. Gullas and D. Jakosalem Streets

Barangay Sto. Nino

6000 Cebu City, Philippines