Anne nangandam na

CEBU, Philippines - Nagsugod na si Anne Curtis sa pagpangandam sa iyang hugyaw nga production number alang sa anniversary sa “It’s Showtime” sunod buwan. Gibutyag sa aktres nga matawag nga “buwis-buhay” ang iyang buhaton.

Usbon ang play date

Dili madayon ang pagpasalida sa pelikulang Girlfriend for Hire karong September 23. Padayon nga nangita og best play date ang Viva Films sa maong pelikula nga gibidahan nila ni Andre Paras ug Yassi Pressman.

AlDub sikat sa Canada

Nangandoy ang mga Pinoy didto sa Canada nga makabisita sa ilang dapit ang ilang mga idolo nga sila si Alden Richards ug Maine Mendoza. Nagsunod sila kanunay sa mga episode sa AlDub Kalyeserye sa Eat Bulaga.

Ejay kiligon ni Ellen

Giangkon ni Ejay Falcon nga kiligon gyud siya basta si Ellen Adarna ang iyang kauban. Padayon nga nag-ilhanay ang duha sa tagsa-tagsa nila ka mga kaugalingon. Nagkasuod sila og maayo gumikan sa seryeng Pasion de Amor.

Talagsaong karisma

Giangkon sa direktor sa seryeng On The Wings of Love nga si Antoinette Jadaone nga wala niya damha ang init nga paghangop sa mga tawo sa maong serye. Suma pa sa direktor nga mao kini ang labing una niya nga serye.  Matud pa niya nga duna gyu’y talagsaong karisma ang mga bida sa maong serye nga sila si Nadine Lustre ug James Reid.

Archie mag-negosyo

Mitungha si Archie Alemania sa Culinary Arts School ug target niya nga magtukod og kaugalingong restaurant. Suma pa ni Archie nga dugay na niya nga gipangandoy nga makaluto og mga lamiang pagkaon.

Anniversary concert

Saulogon sa singer nga si Kyla ang iyang 15th anniversary sa music industry  karong Nobyembre. Aduna’y anniversary concert ang singer karong Nobyembre 20 sa KIA Theater sa  Cubao, Quezon City. Special guests niya sila si KZ Tandingan, Erik Santos ug Jay R.

Jason molugwa

Malipayong gipahibalo sa  produkto sa The Voice of The Philippines Season 2 nga si Jason James Dy nga siya maoy front act sa concert ni  Carly Rae Jepsen dinhi sa Pilipinas karong September 14 sa  Smart Araneta Coliseum.  Dakong garbo alang kang Jason nga makatrabaho ang nahisgutang international singer.

Nash mopahilak ugma

Si Nash Aguas maoy mopahilak sa mga TV viewers ugma sa  gabii  sa pagbida niya sa Maalaala Mo Kaya. Modala siya isip anak  sa usa ka babaye nga duna’y deperensya sa panghuna-huna ug pagadalhon kini ni Snooky Serna.Malakip usab sa maong episode sila si Maureen Mauricio, Pen Medina, JB Agustin, Nene Tamayo, Crispin Pineda, Rufami, Marnie Lapuz, Poppert, ug Peewee O Hara.

Uyab na gyud

Dako ang pagtuo ni Rommel Padilla nga duna gyu’y relasyon ang iyang anak nga si Daniel Padilla ngadto sa ka-loveteam niini nga si Kathryn Bernardo.  Siya mismo ang nakakita kung unsa ka-sweet ang duha kung mag-uban. Pabilin nga tak-om sila si Kathryn ug Daniel sa tinud-anay nila nga status.

Enrique hubog, gibastos si Jessy?

Hubog matud pa si Enrique Gil niadtong nagkatrokis sila si Luis Manzano  sulod sa eroplano sa ilang pagpaingon sa London (dili pabalik sa Pilipinas), alang sa show sa ASAP didto.

Suma pa sa tinubdan sa www.fashionpulis.com gipainom si Enrique og black label nila ni Paulo Avelino ug Jake Cuenca hinungdan nga nahubog ang nahisgutan.

Walay klarong detalye kun giunsa gyud niya si Jessy Mendiola, apan gisamukan matud pa ang dalaga sa gihimo ni Enrique ngadto kaniya. Dinhi na matud pa ni eksena si Luis isip pagdepensa kang Jessy.

Nagkatinubagay sila si Enrique ug Luis ug nitumaw ang init nga panaglalis, apan wala matud pa nagsumbagay kay na-uwang sila sa ilang mga kaubanan.

Apan sa post ni IC Mendoza nga gimantala sab sa www.fashionpulis.com, may blind item kini kabahin sa usa ka sikat nga young actor nga nahubog matud pa sakay sa eroplano paingon sa Europe diin, “ sinusuntok at kinukulit daw nito ang kasamang young actress.”

Dinhi nahitabo ang komosyon.

Dugang pa ni IC sa iyang post, gisagpa ni Liza Soberano ang iyang ka loveteam gumikan sa ka kiat na niini.

Apan si Jake sa Pep Alerts kagahapon, nanghimakak nga lakip siya sa maong hitabo gumikan kay natulog matud pa siya atol sa nahisgutan nga byahe. “Hindi po ako involved.” Dugang pa niini, wala siya sa posisyon aron mukomento kabahin sa maong taho.

Si Jessy sab sa iyang post wala mukomento kabahin sa maong taho apan may salabtunon kini nga mensahe nga kinutlo niya gikan kang Buddha nga  nagkanayon, Three things cannot be long hidden: the sun, the moon and the truth.  

Nagpost sab siya og hulagway nila ni Luis diin nagpasalamat siya niini gumikan sa matud pa, “protekta.”

Human niniya sa TV 5 King mu-focus sa  pagtungha

Gusto ni King Anthony Perez nga makahatag og dakong oras alang sa iyang pagtungha og abogasya hinungdan nga nipahimulos siya sa gitanyag nga  Special Limited Voluntary Separation Program, (dili early retirement package nga maoy nabalita kagahapon), sa TV5 kaniya.

Kahinumduman nga nagsugod si King sa iyang pagka-reporter sa Aksyon Bisayas sa TV5 niadtong 2013 ug dako gyud og natabang ang maong network sa pagbaid kaniya alang sa pagpadangat og impormasyon ngadto sa publiko.

Una na nga nabalita dinhi sa Banat News kagahapon ang pagbiya ni King sa TV5  uban sa laing mga personalidad sa news department sa maong istasyon, sama nila ni Dennis Tanoc ug Andrea Patena.

“Seguro karon, mo-focus lang una ko sa akong pag-eskwela, pero  kung duna’y offer, willing gihapon ko motrabaho sa media basta kaya lang sa oras,” saysay pa ni King.

Dugang pa niya nga nahimo nang tipik sa iyang kinabuhi ang TV5 busa mingawon gyud siya niini ilabi na sa mga tawo nga iyang nakatrabaho.

“I was happy with TV5. My good experience with TV5 gave me the necessary foundation in the industry. It established my name in the industry. I will miss doing broadcast stories and the people in the industry. But I have to let go for reasons that are wise. It was a hard decision to make. I hope I can come back in the media soon,” nagkanayon si King.

Sa kapin sa  duha ka tuig  niya nga pagtrabaho isip tigbalita, nakalangkat  si King og pasidungog sa International Justice Mission kung diin siya ang nahimutang sa ikaduhang puwesto sa Feature category niadtong 2013.

Nahimo usab siya nga nominado kaniadto sa kategoriyang Reporter of the Year sa Globe Media Excellence Award sa  tuig 2013 ug 2014.

Nahimutang si King sa ikaduhang puwesto sa Kapisanan ng mga Brodkaster ng Pilipinas (KBP) accreditation exam sa miaging tuig.

Usa sa dili malimtan ni King mao ang iyang Bagyong  Yolanda coverage , ug ang pagtuki niya sa istorya sa maanyag nga dalaga kinsa gipasanginlan nga wala mobayad sa gipuy-an niya nga resort sulod sa pipila ka adlaw.

Nalambigit usab ang maong babaye sa pagsulod og boutique ug wala mobayad sa gipanguha niya nga baligya.

“Sa maong istorya, wala ko magdahom nga ing-ana diay kakusog ang impact niini. Atong gipakita nga bisan matawag nga miagi siya og lahi nga dalan sa kinabuhi, atong napadungog sa katawhan ang iyang habig,” panapos pa ni King. 

Julia nag-sorry, video matud dili kompleto

Nangayo og pasaylo si Julia Barretto ngadto sa iyang mga fans nga wala niya natagad didto sa London.

Kahinumduman nga mikatap sa internet ang video nga gi-post sa usa ka tawo nga nagbase didto sa London  kung diin makita nga migawas si Julia sa building ug sa dihang gitawag kini sa iyang fans, wala gyud kini nanumbaling ug nideretso lang pagsakay sa naghuwat nga sakyanan.

Lakip  si Julia sa mga artista sa ABS-CBN nga nitikang sa  London alang sa special episode sa ASAP .

Tungod sa maong nikatap nga video, gilabhan pag-ayo si Julia sa netizens.

Nangayo og pasaylo si Julia sa iyang fans sa wala niya paglingi o bisan gamay na man lang nga pahiyom.

“You can tell me it’s easy to even glance, how fast it is to smile or wave back...Because yes it is and I apologize for not having done so,” nagkanayon ang aktres.

Apan giklaro ni Julia nga wala mapakita sa video ang pipila ka bahin kung diin nitagad gyud siya sa iyang fans.

Suma pa sa aktres nga dili angayan nga kuwestyonon  ang paghigugma niya ngadto sa iyang  fans.

“These people are the ones who helped me get to where I am now.You can be laughing at me right now, mocking me or thinking this girl is just trying to save herself.This is myself explaining even when I do not even have to, but I am.I am for my fans. I am for myself because I can not take way too much judgment from people who do not know me behind the camera,” dugang pa ni Julia.