Taxi Ride

Final exam week na. Ang uban ni-graduate na! Sa mga nipaso na, Congratulations! Sa mga mu-take og final exam sugod ugma, Good Luck! Nakahinumdom na man lang hinuon ko pag-graduate namo og Masscom sa USJR in October 1999, kay igo ra gyud mi nakasulod sa gymnasium sa Basak campus, nibunok ang ulan. Unya paghuman sa graduation ceremony kay nihunong sab siya, as in best in timing. Mao toy gitawag og blessing from heaven! Pakpak

Apan ang dili gyud nako malimtan kay nagpaso mi gikan sa main building-taas-taas sab nga laktunon gyud-paingon sa gymnasium, madag-umon ang langit, mabugnaw ang hangin. Feel kaayo nako ang moment! Nihangad ko ug sa akong hunahuna nihunghung sa mga panganod: Ugma damlag kinahanglang makamugna gyud ko og pangalan ug magmarka sa kalibutan sa media. Best in Confidence goes to me! Bow! Hahahaha!

Pero ang driver sa taxi nga si Kuya Mar nga maoy nagmaneho sa unit nga akong nasakyan adtong Huwebes sa buntag human nituwak ang ulan kay kinahanglan og confidence ug pag-ampo. Kanhi siya nagtrabaho sa Qatar isip driver og heavy equipment. Taga Carmen, Cebu siya ug nahibalik dinhi sa Pilipinas niadtong 2012. Karon nanghinaot siya nga mupasar sa iyang interview kay manimpad na usab siya sa gawas sa nasud sanglit mag-college na ang iyang kamaguwangan nga anak babaye nga nag-ead og 17-anyos. Lima matud pa iyang mga anak, ang kamanghuran mga kaluha.

Like nako si Kuya Mar kay tsika ug matinahuron. Dili sab baho iyang taxi…hahaha. Pagsakay pa lamang nako, nag-good morning na siya. I like drivers who are courteous!  Tsika niya, dili unta gyud siya mutrabaho kay tugnaw matud pa ug maggikan pa siya sa Carmen. Pero bisan og dili mu-duty kay pabayaron man gihapon sa abang nga P1, 200. Niya pa, kinahanglan mukita gyud og P3, 000 aron aduna nay ikapalit og bugas ug magasto sa uban pang panginahanglanon sa iyang pamilya. Kini kay gawas sa abang, mugasto pa man sab siya para sa fuel balig P1000. Ingon niana ang iyang panikaysikay tungod ug alang sa iyang pamilya.

Karon nga tingpaso na hinaot unta nga wala makawang ang paningkamot sa mga ginikanan nga sama ni Kuya Mar, nanikaysikay tungod ug alang sa pamilya. Kani gyud nga kamatuoran ang rason nga naningkamot gyud ko sa una og eskuyla uroy, dili gyud ko mulaag intawon kay ma-guilty ko sa paghago sa akong mama ug papa. Balay-library-(kunohay, newspaper ra gud akong basahon, hahaha) school ra gyud akong rota sa una. First nakong tekang og discohan kay October na, katong graduating nako, diha sa Club Royale sa una. Anyway sa tanang malampusong ni-graduate, Congratulations. Sa mga wala nakapaso kay wala nagtarong pagtungha, hunahunaa ninyo ang panikaysikay sa inyong mga ginikanan, sama sa paningkamot ni Kuya Mar alang sa iyang pamilya. Sa maong pamaagi makapaso na gyud mo karong Marso! Pakpak!

Reaction? I-text ka na dungan sa imong ngalan ug address pinaagi sa: 0928-9903-058!