Facebook Detox

Maghisgot na lang gyud ko ani kay na-misinterpret sa uban ang akong kalit nga pagkawagtang sa Facebook world. May mga nangutana gi-private ba nako akong account, gi-unfriend ba nako sila or gi-block kay wala nako igkita lately. Pero ang labing liki nga pangutana: Gi-deactivate nimo imong account kay naduslak kas gugma? Pakkk ka hugyaw!

Yes and No! Yes gi-deactivate nako akong account adtong Lunes, September 15 sa udto. No, dili akong pagkaduslak ang rason. Ka hugyaw gud? Ha ha ha! Wala lang gikapoy lang gyud ko og kalit anang Facebook kay lately for me mura’g wala na man siya ni-serve sa iyang purpose for me. Feel lang nako kinahanglan ko mag-"Facebook detox."  Supposedly mubalik nako karong adlawa, pero feel pa man nako mag-extend sa akong FB detox! Pakkk!

Bitaw, I thought dili nako kaya nga mag-deactivate kay labihan baya nako ka active diha nga social media platform. Apan naka- feel ko nga maluya man ko anang FB uy, daghan kaayong mga negative people, posts and pictures uy. Awww! Di ko ganahan ma-absorb ilang nega vibes, kay maglabad akong ulo. Maapektuhan ko emotionally and mentally.

Ug nganong dili man? Una, kanang FB mag-chill ra gud unta ta dinha, lingaw-lingaw, makighugoyhugoy ug makighimamat og mga bag-ong higala. Pero dili na man na maoy nahitabo ron sa FB uy gumikan niining musunod:

1. Daghan kaayong mga TH (trying hard). Mag-iningles gyud sa ilang posts, unya perteng simanga sa sentence construction intawon uy. Naa man gud nay grammar and spell check feature unta dinha nganong masayup man gyud? Pero my biggest question: Nganong mag-iningles man gyud kun dili makaya nga mga bisaya man gyud tang dagko!?

2. Daghan kaayong mga katkatira! Magsige’g panghambog hain sila mangaon, hain sila nanuroy, diin sila nag-night out uban pa. Ayaw mo'g sige’g panghambog kay wala nay ayo!

3. Daghan kaayong mga kusog mamalikas uy! Sa FB mag-away ug magsige’g pangaway. Kun mamalikas grabe mura gyud mga walay kamatayon! Hello, sakit intawon sa mata nang inyong mga posts nga dili makatabang sa ekonomiya sa Pilipinas uy!

4. Daghan kaayong feeler! Feeling suhito. Feeling sila ray sakto. Feeling sila ray makamao. Feeling perte gyud nila ka bright! Tabang! Ngano diay na sila? Awww!

5. Maka-stress sab nang mga magkadugo ra unya magtinubagay pinaagi sa ilang mga posts. Pwede mag-istorya mo sa inyong mga problema kabahin sa inyong tagsa-tagsa ka pamilya diha lang sa inyong mga balay? Dili man gud mubarato ang presyo sa gasolina kun mag-away mo diha sa FB te!

6. Labaw sa tanan, daghan kaayong mga artista sa FB uyy. Grabe kaayo maka edit sa ilang mga pictures. Dili mu-proud sa inyong mga dagway dong? Hoy pamahuway mo og sayo, have a healthy lifestyle aron mugawas inyong natural glow! Dapat beauty from within uyy, dili camera 360!  Pero akoa ra na ha. Posibling sayup ko. Pero mao gyud na akong nabantayan sa FB lately. Maong nag-FB detox lang sa ko. Kun pareha mo og obserbasyon, pwes pag-FB detox sab mo aron maka feel mo kahayahay sa pamati. Apan dili ni pugsanay kay dili baya ko feeler! Pakkk!

Bitaw uy, enjoy lang gud ta. Gamiton nato nang FB as a form of entertainment dili kay magsabwag ta og nega vibes uy. Stressful na kaayo ang life dai uy utang buot! Let's laugh out loud, chill lang and have fun fun fun! Pakpak!

Happy 74th Birthday dyRC-Radyo Calungsod diay karong adlawa, and mainitong pagsaulog usab sa 20th Cebu Press Freedom Week today ngadto sa akong mga kauban sa buhat!  Fun fun fun, okay?

Reaksyon? I-text sa 0928-9903-058. Butangi lang og ngalan ug address! Dili pwede nega ha, fun fun fun and laugh out loud lang! Awww!

Eskina tampo

Dunay uban kanato ang todo trabaho karong panahona busa dili malikayan nga malimtan na nila ang pag-atiman sa ilang hitsura. Kini maoy hinungdan nga ma-haggard na imong face, adunay pimples, dark circles or eye bags, masakit ka permi ug sapoton pa gyud ka.

   Apan kung ikaw adunay pagkugi sa paghigugma sa imong kaugalingon bisan unsa ka busy, hatagan gyud nimo og higayon nga dili mawala ang imong pagka-blooming ug healthy.  Kana ang sign o timailhan nga maayo kaayo nimo pagkadala ang imong kaugalingon ug happy ka sa imong gipangbuhat.  Busa  kini ang mga simple tips arun blooming ka ug healthy samtang naghimo sa imong matag adlaw nga pagabuhaton.

Buntag

• Sa pagmata nimo sa buntag , ug sa dili pa ka mokaon, moinom gyud ka og tubig.  Suma pa sa mga pagtuon,  makatabang kini sa paglikay sa sakit  sa kasing-kasing, labad sa ulo, arthritis, ug uban pa. Makatabang usab kini sa pagpanindot sa imong panit.

• Mag-exercise pud ta og ginagmay sa buntag.  Bisan 15 minutos , okay na kaayo na labi na kung gadali ka. 

• Dili kalimtan ang pagpamahaw.  Sa ginaingun pa, "breakfast is the most important meal." Ang pagpamahaw maoy maghatag kanato og enerhiya aron dili ka maluya sa imong paglakaw.

GABII

• Sa dili pa ka matulog, ayaw gayud kalimot sa paglimpyo sa kalawasan (sa nawung, tiil ug bukton).  Ayaw dad-a sa pagkatulog ang hugaw nga nipilit sa imong panit tibuok adlaw.  Sa imong pagkatolog, diha nimo mabatyagan ang hapsay ug gaan nga pamati sa imong panit kung kini limpyo.  Manghilam-os gayud ka sa imong nawung arun di kini magka pimples ug allergy ilabi na kung naka make up ka.

• Dili nato malikayan usahay ang dark circles ug eyebags ilabi na kung wala tay tulog ug stress kaayo ta. Patungi og  bugnaw nga hiniwang  pipino ang imong mata sulod sa pipila ka minutos sa dili pa ka matulog.  Inigkahuman niini, inudnud ang limpyo nga panapton sa ubos sa imong mata . (Madungog si DJ  Sam sa 103.5 Wild FM, gikan sa Lunes hangtud sa Sabado, 6-9pm)

Pinakalit

•Ayaw gamita pagtrapo sa imong nawong ang towel nga maoy imong gigamit pagtrapo sa imong buhok. Kini aron dili mabalhin sa imong nawong ang oil nga gikan sa imong buhok nga maoy makaingon sa bugas.

• Likayi o batuki ang blackheads pinaagi sa pagpahid og honey o dugos sa imong nawong.

• Aron maanindot ang imong panit, kanunaya ang pag-inom og lemon water (tubig nga dunay lemon).

• Inom og usa ka baso nga tubig sa dayon nimong pagkatulog inig ka gabii. Kini aron malikayan ang paghubag sa imong mata sa pagbangon nimo sa buntag.

• Matag higayon nga dili ka manghilam-os aron pagtangtang sa mga hugaw ug abog, matiguwang ang imong nawong balig 27 ka adlaw.