Samtang nagkaon ko og nilat-ang baka sa kilid-kilid sa Punta Princesa adtong Martes sa gabii, kalit nga nibutho ang akong higala nga kapin na sa usa ka tuig nga wala nako igkita. Sa daplin sa dalan, inubanan sa paghigop sa dili na kaayo init nga sabaw, ug pag-usap sa humok kaayo nga unod sa baka, nagtsika mi og pinakalit. Pakkk!
Gidetalye sa akong amiga nga usa niana ka Biyernes Santo, pipila ka tuig na ang nilabay, ako siyang gikuyogan sa Archdiocesan Shrine of Our Lady of Lourdes aron mangumpisal. Sa hataas nga panahon wala gyud siya ka kumpisal. Walay kahumanan iyang mga problema, maong ako siya'ng giingnan nga kinahanglan nga malimpyohan gyud iyang kasingkasing kay bisa’g unsaon pa niya’g ampo, dili gyud makasulod ug makapuyo ang Ginoo diha niya. Renewal gyud ang tambal sa iyang sitwasyon, aron muabot ang mga grasya. Ug tuod man, nipatuo siya nako. Pakpak!
Ug tuod man, atubangan sa pari, hilabihan niyang naka ngaab. Feeling matud pa niya, gibanlas sa iyang mga luha ang tanang kasakit, kasagmuyo, ug uban pa nga mga negatibong emosyon diha sa iyang mga dughan. Napuno siya sa kaligotgot, natigom ang tanan niyang kalagot sanglit taas kaayong panahon ang nilabay nga wala siya nangumpisal. Niadtong tungora pa gyud, gikuha ang ilang balay og kadugo ra usab nila. Giingnan matud pa siya sa pari nga dili na lamang mabalaka kay hatagan ra siya sa Ginoo og balay sa dili madugay. Nidugang matud pa ang pari sa pag-ingon nga kun unsay nawagtang niya, mahibalik ra kini kaniya nga mas dako ug mas nindot pa.
Nituo siya ug nisalig nga ang tanan matuman. Tuod man, sa pagligid sa mga katuigan, nakabaton na siya og balay isip gasa—mas nindot pa kaysa nawagtang niya. Ug kay problemado man ang iyang anak, ako siyang giingnan nga iya na usab nga turno nga kuyogan kini sa kumpisalan aron malamdagan. Unya niingon siya: "Ang imong hinatag nga rosaryohan naa pa nako,dako kaayo ni og natabang gyud. Salamat kaayo." Pakpak!
So there you go dear okRYANians! Believe in the power of prayer. Hang on to your faith. God heals and provides in his perfect time!