CEBU, Philippines - Si Coco Martin maoy giingong ipares ni Kim Chiu sa umaabot nga serye sa ABS-CBN. Matud pa nga gisugdan na og hikay ang script niini ug parte.
Love Hotline matsugi
Gikatahong dili na magdugay sa kahanginan ang programa ni Jean Garcia sa GMA News TV nga Love Hotline. Wala hinuon mabalaka si Jean sa maong taho gumikan kay mobalik siya og aktibo sa mga serye.
LJ nag-negosyo og cake
Dili aktibo si LJ Moreno sa showbiz karong panahona gumikan kay busy kini sa iyang negosyo nga bakeshop. Suma pa ni-click ang mga cake nga gipamaligya ni LJ.
Sikat sa laing lugar
Bag-ohay lang nga gilusad sa Pilipinas ang singing career sa acoustic sweetheart nga si Sabrina Orial. Apan giingong taud-taud na siya nga ilado sa Indonesia, Malaysia ug Singapore.
Bela scriptwriter na
Gipangandoy ni Bela Padilla nga mahimong script writer busa iyaha kining kab-uton karong tuiga. Gisugdan na ni Bela ang pagsulat og movie script ug panghinaut niya nga mataypan kini og movie producer.
Kanhi uyab mopatim-aw
Gikahinaman na pag-ayo sa fans ni John Lloyd Cruz ang paglugwa sa iyang kanhi uyab nga si Rufa Guttierez sa usa ka episode sa sitcom nga Home Sweetie Home sa ABS-CBN. Modala si Ruffa isip ex-girlfriend ni Lloydie sa maong sitcom. Gipanglantawan nga maukay gyud ang viewers niini gumikan mao kini ang labing una nga proyekto nga nag-uban ang duha sukad sila nagbuwag sulod sa dugay nga katuigan.
Bisan unsa nga project
Dili isyu alang kang Ejay Falcon ang pagkabutang niya sa Galema: Anak ni Zuma bisan pa man nga gikan siya nahimong bida sa natapos na nga Dugong Buhay sa ABS-CBN. Matud pa sa aktor nga sukad-sukad, wala gyud siya namili og proyekto.
Padayon ang padiskarte
Tsika pa ni Paulo Avelino nga duna gihapon sila’y komunikasyon ni KC Concepcion. Nasayran nga nitungha si KC didto sa laing nasud apan giklaro ni Paulo nga dili gihapon siya mohunong sa pagpanguyab kang KC.
Nakaamgo na
Napanglantawan ni Aljur Abrenica nga dili na kaayo sila maglalis sa iyang uyab nga si Kylie Padilla karong tuiga gumikan kay susama na sila nga nakahibalo sa pagdumala sa ilang mga oras. Giseguro sa duha nga bisan sa ilang ka-busy, dili kini makaapekto sa dagan sa ilang relasyon.
Wala maglisod
Gibutyag ni Eula Caballero nga wala na siya maglisod sa iyang role nga taxi driver sa umaabot nga programa sa TV5 nga One of the Boys gumikan kay kahibalo na man siya daan momaneho og sakyanan.
Dili ganahan
Tsika pa ni Enzo Pineda nga dili siya ganahan nga iyang makapares sa proyekto ang iyang girlfriend nga si Louise delos Reyes. Suma pa nga posibleng dili makilig ang mga tawo gumikan kay uyab na man sila daan.
Erich nahilom?
Wala na manumbaling si Erich Gonzales sa nitumaw nga istorya nga matud pa nahilom na ang iyang career human sa pantaserye nila ni Coco Martin niadto nga Juan dela Cruz. Masaligon si Erich nga dunay giandam nga dakong project ang ABS-CBN kaniya.
Komportable na motupad
Gibutyag ni Billy Crawford nga dili na isyu kung magtupad sila ni Coleen Garcia sa pipila ka mga segment sa It’s Showtime sanglit niangkon na man siya nga nahigugma siya sa iyang co-host. Giklaro sa TV host nidiskarte pa siya sa dalaga ug wala pa siya sugta niini.
Higala ra gyud
Giklaro ni Enchong Dee nga managhigala ra gyud sila ni Dominique Cojuangco ug wala sila’y tinagoan nga relasyon. Anak si Dominique nila ni Gretchen Barretto ug sa iyang longtime partner nga si Tonyboy Cojuangco.
Kathryn na-pressure
Giangkon ni Kathryn Bernardo nga dili gyud malikayan nga ma-pressure siya usahay sa serye nila ni Daniel Padilla nga Got To Believe gumikan kay gikinahanglan gyud nila nga mamintinar ang kakusog niini. Kahinumduman nga kanunay nahimong trending sa Twitter ang kasagaran nga episodes niini.