Pag-ampo.

Pagsalig. Pasalamat 2013 Na-late gyud ko og 30 minutos sa okRYAn sa dyRC adtong Biyernes  sa buntag. Ang sunod-sunod nga pagbangon og sayo aron makasimba sa 3a.m. nga misa unya dugay ta matulog inig kagabii, nanukot na gyud sa akong lawas. Hinungdan nga pagka Biyernes sa kaadlawon, pagmata nako og 2:30 a.m. sakit kaayo akong lawas, katugon pa gyud kaayo ko. Pwes 4:30am na nga misa akong gitambongan—maayo na lang kay duha ang Misa de Gallo sa Shrine of Our Lady of Lourdes. Pagkahuman sa misa hapit na 6a.m. natulog ko og balik kay kapoy pa gyud. Unsang pagka unsaa nga nakamata man ko’g 9:15a.m. hinungdan nga nakagawas ko sa balay after 30 minutes na. Uy,kalisod ba sa taxi intawon, mga 20 minutes sad gyud ko og hinuwat (nakahuman gud ko’g rosary samtang nagpaabot). Ug tuod man dihang nakasakay na ko, pag-abot sa Happy Valley (kay naa man sa Fuente ang dyRC), OM Gee ka heavy ba intawon sa traffic. Pwes, ang ending 30 minutes late akong beauty! Pakkk

Wala na lang ko magyawyaw uy, kinsa may akong basulon? Ang maong sitwasyon nagpasabot nga Pasko na gyud. People are out, roads are very busy. Christmas is really here. Inig kagabii mao sang sitwasyona, matanggong ka sa downtown og mga duha ka oras usa ka makasakay paingon sa imong destinasyon. This is Christmas, a lot of people are out shopping, buying gifts, going around. Pasko na lagi gyud! Pakpak!

Apan unsa man gyud ang tinuod nga kahulugan sa Pasko? Una, mao kini ang panahon nga kita magmaya  kay natawo na ang Manunubos. Kinahanglan nga maandam kita diha sa iyang pag-abot, pinaagi sa pagpangumpisal, aron limpyo ang atong kasingkasing ug tunhay nga makasulod si Kristo. Ikaduha, ang  Pasko dili diha masukod sa gidak-on o kamahalon sa regalo, gumikan kay labing bililhon nga gasa walay presyo ug dili mapalit, sanglit nagagikan lamang kini sa imong kasingkasing. Pure love has no price tag.

Kay kun maghisgot kita og regalo, hagbay ra kini natong nadawat gikan sa mga tawo ug mga nasud nga miduyog kanato human sa makusog nga linog ug kabangis sa bagyong Yolanda nga mitay-og ug mikusukuso sa Visayas. Mga pribadong kompaniya mihimo sa ilang kinasingkasing nga pamaagi aron makatabang. Kami sa Freeman ug Banat News, wala una mupahigayon sa among hugyaw nga Christmas party diin matag tuig adunay contest sa presentation matag department diin mukabat ngadto sa P30, 000 ang first prize. Ang gahin alang niini gibubo na para sa relief goods didto sa northern Cebu. Ang among Chairman sa The Freeman/Banat News nga si Jose “Sir Dodong” Gullas sa iyang pangidaron karon, nangunay gyud og drive sa sakyanan paingon sa Medellin aron maghatod og hinabang gikan sa The Freeman Foundation (lahi pa ang gikan sa Star Group of Publications diin mahisakop ang Banat News ug Freeman), kay nakasabot siya sa dakong panginahanglanon sa mga biktima didto. Ang iyang hamiling kapikas nga si maam Nena, imbes mag-abli unta og café (kay lami kaayo iyang mga cupcakes baya, siguradong dugukon gyud), mipadaplin una sa maong tinguha kay niya pa ang budget alang niana gigamit usa para sa mga biktima sa bagyo. Ang among Presidente nga si sir Miguel Belmonte mitaak pud sa Bantayan Island aron maghatud og hinabang. Hinungdan nga nagsalo-salo na lang mi ug dili kaayo hugyaw ang raffle   prizes.

So kasagaran sa ginagmay nga pamaagi naninguha nga makatabang. Therefore, bisan pa man sa kalamidad nga atong nasinati, magmapasalamaton kita gumikan kay natagamtam nato ang tinuod nga kahulugan sa Pasko: Pag-inonungay ug Pagminahalay nga walay gipaabot nga sukli o balos. Indeed that’s a Merry Christmas! Apan luyo niining tanan, nasayud ako nga daghan pa gihapon sa mga biktima ang nagsangkiig nga makabangon, hinungdan nga padayon nato sila nga iampo, ug diha sa atong pag-ampo kita musalig nga kini pagadunggon busa angayan kita nga magmapasalamaton sa tanang higayon!

Magdungog gihapon kita sa dyRC—Radyo Calungsod 648 kHz., 10am to 12 noon, Lunes ngadto sa Sabado. Pangitaa ko sa Facebook: [email protected]