Mama Mary

Niadtong November 12 , sa gabii, labihan ka kusog sa ulan samtang nisimba ko sa Cathedral. Hinungdan nga nagpaabot lamang usa ko nga mutuwak ang ulan, pinaagi sa pagrosaryo. Dihang hapit nako mahuman, mibunok og samot ang uwan. Dihang nahuman nako og rosary, kusog gihapon ang ulan. Wala pa gyud koy tarong katulog sa milabay nga gabii, busa kapoy na akong lawas ug labad na kaayo akong ulo. Hinungdan nga nagpanikad ko nga makauli aron ipahuway ang lapoy ko nga lawas. Apan unsaon man nga migara man ang ulan?

Gihugtan nako ang akong pag-ampo. Nagpatabang ko kang Mama Mary, nga hangyuon ang iyang anak nga patuwakon na ang ulan. Ug tuod man, mutuo mo ug sa dili, wala ray lima ka minutos ang milabay kalit nga mihunong ang ulan. Kana bitaw'ng murag nay switch nga kun imong tulpokon ang on, musiga dayon ug unya imong pisliton ang off, mawagtang pud dayon ang suga. Ingon kadali nga gidungog akong pag-ampo. Ug sa dihang migawas ko sa cathedral ug mihangad sa langit, labihan ka tin-aw sa panganod ug may pipila pa ka mga bituon nga inanay na nga migitib ug nagkidlap-kidlap. Igo na lamang ko nga mipahiyum ug nagpasalamat! Alleluia!

Hinuon, dili kadto ang unang higayon nga diha-diha dayon gidungog ang akong pag-ampo. Kun tigbasahan gayud kamo og okRYAN, makahinumdom gayud kamo nga pipila ka bulan na ang milabay naghisgot pud ko og usa ka Sabado sa gabii nga labihan ka kusog sa ulan nga mimugna og pagbaha sa downtown. Mao puy hinungdan nga walay mga puj sa Colon ug napunod ang mga pasahero. Nag-rosaryo pud ko adtong tungora samtang nagbarog sa kilid sa dalan Sanciangko nagpaabot og masakyan paingon sa Punta Princesa. Paghuman nako og rosary, wala gihapoy dyip nga miabot, hinungdan nga nag-ampo ko nga unta adunay muabot nga bakante nga masakyan bisag duha lamang, aron makarga tanan ang mga pasahero. Ug sa dihang, duha o tulo ka minutos lamang ang milabay may tulo ka bakante nga dyip nga ang rota Labangon, ang nagpasunod og abot.

Hinungdan nga giaghat ko kamong tanan nga pahugtan pa ninyo ang inyong pagtuo, diha sa pagrosaryo ug pagpakighinabi sa Ginoo, taliwala niining mga trahedya nga mikusokuso kanato karong panahona. Nasayud ako nga dili lalim ang mawagtangan og mahal sa kinabuhi o mahugmakan og balay, apan laumi, saligi nga ang Ginoo adunay rason nganong gitugot niya nga mahitabo kining tanan. Just hang on to your faith. God is watching us. He is the same God who is good all the time! Amen!

Magdungog gihapon kita sa kahanginan pinaagi sa dyRC---Radyo Calungsod 648kHz., Lunes hangtud sa Sabado, 10am to 12noon. Mahimo pud sa www.dyrc-cebu.com

Sa mga interesado, pangitaa ko sa Facebook: [email protected] Sa Twitter: Penpointtwits

Pagkaon para sa  "transients"

Libuan na ang mga "transient" nga ania sa Sugbo gikan sa Leyte, ilabi na Tacloban City ug Samar nga anaa ipahimutang sa nagkadaiyang evacuation centers sa dakbayan sa Sugbo, Mandaue ug Lapu- Lapu.

Gumikan sa atong kamanggiluy-on kadaghanan kanato ang nagtinguha nga mutabang pinaagi sa pagpakaon kanila. Apan unsa ba nga mga pagkaon ang angayang atong dad-on sa nagkadaiyang evacuation centers? 

Ang blogger nga si Erica Paredes, (Hippie In High Heels) sa iyang artikulo nga namantala sa http://ph.she.yahoo.com , misugyot niining musunod:

1. Init nga sabaw. Pwede ang noodles nga sagulan nimo og carrots ug repolyo, ingon man gikunis-kunis nga karne sa manok. Ipadala kini sa mga evacuation centers ug pakapini na lamang pud og disposable bowls aron dili na sila ma-hassle.

2. Arroz Caldo. Kun mahalan ka sa manok, hulipi kini og utanon ingon man ground pork aron mas daghan imong mahimo ug mas daghan ang makakaon.

3.Sandwiches. Mao kini labing dali nimo nga mabuhat.  Ang tuna maoy labing maayo nga palaman, apan ayaw kini saguli og mayonnaise sanglit dali lamang kining madaot. Ang imong ibutang mustard, dayon butangi og hiniwa nga carrots ug lettuce aron healthy. Ibutang kini og paper bag ug pakapinan na lamang pud og instant juice.

4.Kan-on ug sud-an. Depende kana sa imong budget. Mahimong beef stew o ground pork imong gamiton. Pwede pud inato nga mga pagkaon sama sa pinakbet, baboy nga gisagulan og hipon ingon man adobo.

5.Pancit. Mahimo kining ihulip sa rice, makabusog kaayo. Dali rang lutuon ug sayun rang kan-on-pwede kinamuton. Saguli og utan aron healthy.