Musikang Angayang Ipasigarbo

Malampuson ug mabulukon kaayo ang Paghinumdum: A musical tribute for Maestro Mil Villareal and Queen of Visayan Songs Ms. Susan Fuentes diha sa JRG Halad Museum adtong Domingo sa hapon. Tanang performers, gikan ni Girlie Lapinid Laspiñas kauban ang Mutya Band ngadto na sa bantugan kaayo ug world-class nga UV Chorale, puros gyud maayo. Samtang maminaw ka nila nga miawit sa komposisyon ni  Villareal ug gihatagan og kinabuhi kaniadto ni Fuentes sama sa “Nasulat sa Hangin, Ikaw, Hain Na,” ug mga giawit ni Pilita Corrales kaniadto nga, “Bisan sa Damgo Lang”, “Langit ug Yuta” kansang mga titik iyaha ni Larry Abelgas ug “Ikaw Ang Langit Ko,” nga grand prize winner sa 5th Cebu Popular Music Festival, makapakpak gayud ka sa kahugyaw! Samtang naminaw ko, nakapasalamat gyud ko nga Sugbuanon ko, nga bisdak ko. Kahugyaw naman lang gayud sa atong mga huni uroy, makahuluganon ang matag titik niini. Pakpak!

Mapasalamaton kaayo ko sa magtiayong Sir Dodong ug Maam Nena Gullas nga gidapit ko didto. Mukomedya ang uban nga makahinumdom ta sa atong mga utang kun makadungog kita og karaan nga mga kanta sama sa akong nahigustan, pero dili man. Ang mga kanta nga mugna sa mga nag-una kanato sa duyan makapahinumdum kanato unsa ka maanindot ang atong musika, unsa ka mamugnaon ang atong bisayang kompositor kaniadto, ug labaw sa tanan makatandi ka unsa ka layo ra sa mga bag-ong mga awit karon—kun duna man gani maayo maihap na lang sa tudlo. Nindot sad gyud kaayo manganta silang Ms. Girlie ug ang UV Chorale uyy! Pakpak to the max!

Tulo ka rason nganong mitekang gyud ko sa maong kalihukan, bisan og day-off nako ug kanang Domingo inig human nako’g simba sa buntag sayo igahin nako na og tan-aw og TV ug dvd marathon hangtud na sa gabii. Una mao nga nagtubo man gyud ko nga maminaw niining maong mga awit sa Pilar, Camotes pa lang ko. Matag Domingo samtang magsuwat og lesson plan akong mama maminaw man gyud siya og radyo nga magpatukar niining maong mga awit. Ikaduha mao nga mahugyaw man gyud ko og bisaya nga kanta kay mabulukon ug makahuluganon kaayo ang matag linya, balaknon nga walay sama.  Lahi ra gyud ang bisaya nga kanta, ilabi na ang ginama kaniadto kay maora’g mudulot gyud sa imong kasingkasing, mugitik sa imong dunggan ug makapahinuklog sa imong hunahuna. Ikatulo mao nga pagbasa nako sa article ni The Freeman entertainment editor Vanessa Balbuena adtong Sabado kabahin sa maong kalihukan akong nasayran nga “by invitation” ra diay ang maong tribute. Pagka hilason na ba lang pud nako og dili ko mulugwa. Pakkk!

Sakto si Kapamilyang Leo Lastimosa nga ma-institutionalize gyud ang pag-amoma sa mga kantang bisaya, nga gikinahanglan ang karisma sa usa ka Mayor Michael Rama aron mapalanog kining maong mga awit sa kahanginan pinaagi sa nagkadaiyang mga radyo sa Sugbo. Naa na tuod sa KBP Code nga kinahanglang magpatukar og upat ka OPM kada usa ka oras, apan dili ko sigurado kun ang tanan misunod ba gyud niini. Sa ako hinuong programa sa dyRC, naggahin gyud ko og adlaw para sa mga bisaya nga mga kanta kay gawas nga ganahan ko, daghan sa akong mga listeners nga mga batan-on ang mu-request niini para sa ilang mga lola ug lolo. Apan naa lang puy mga panahon nga dili kaayo maayo ang mga kanta nga atong makit-an sa Youtube, bungol ang tingog ug dili maayo pagka record. Gumikan pud siguro sa kadugay na niining maong mga kanta. Maong naghinamhinam nako sa giingon ni Sir Dodong nga aduna matud pay gimugna nga album nga puros bisaya nga kanta ug ang UV Chorale maoy nag-awit kay basin makakuha unya ko og kopya ug mapatukar nako sa atong programa sa dyRC. For now, salamat Sir Dodong ug Maam Nena Gullas sa inyong pagdapit. Labaw sa tanan, salamat sa imong mga paningkamot aron ang atong musika dili mahikalimtan ug mahanaw, hinunua, kini atong saw-an ug mapaminaw matag karon ug unya. Pakpak!

Tuod sa di pa ko malimot, bisita mo sa JRG Halad Museum dear okRYANians, (naa sa eskina V. Gullas ug D. Jakosalem, atbang sa among opisina), kay sigurado ko nga mahugyaw mo sa inyong makita dinhi nga nagsaulog sa ka maanindot sa Musikang Binisiya kaniadto. As in! Pakpak!

Uyab na lagi!

Kumpirmado. Bisan og dili pa muangkon sila si Sarah Geronimo ug Matteo Guidicelli, apan ang tinubdan sa Philippine Star Entertainment mikupirma nga manag-uyab na matud pa ang duruha.

Human sa napakgang, napukan ug natuldukan nga relasyon ngadto sa mga gwapo ug sikat nga mga personalidad nga naglakip nila ni John Lloyd Cruz, Rayver Cruz ug Gerald Anderson, karon nahibalag na gayud matud pa ni Sarah ang “Right One.”

Suma pa sa usa ka suod ngadto sa duruha, sa katapusan, nakakita na gayud si Sarah og lalaki nga nauyonan sa iyang mga ginikanan, ilabi ni Mommy Divine.

Aprobado matud pa sa inahan ni Sarah si Matteo, kinsa kaliwat og ilado ug respetado nga pamilya dinhi sa Sugbo. Si Matteo apo ni kanhi Chief Justice Marcelo Fernan.

Nagkasuod ang duruha pipila ka bulan ang milabay dihang nahimong guest ni Sarah si Matteo sa iyang series of shows sa Amerika, usa na niini ang didto sa Hawaii. Mao ning mga panahona nga gikatahong nagkabuwag matud pa sila ni Matteo ug Jessy Mendiola gumikan niining maong hulagway nilang duha ni Sarah ug sa Sugbuanong aktor ug athlete. Sa text ra matud pa nakigbuwag si Matteo kang Jessy.

Apan si Jessy sa interview sa Cosmopolitan Magazine sa milabay nga buwan miklaro nga walay panagbuwag nga nahitabo tali nila ni Matteo, gumikan kay wala man gayud sila magkauyab sa nahisgutan. Bugtong si JM de Guzman lamang ang lalaki nga giangkon ni Jessy nga nahimo niyang hinigugma matud pa.

Samtang si Sarah sa usa ka interview  wala nihimakak ug wala pud niangkon sa gikatahong panaghigugmaay matud pa nila ni Matteo. Mihangyo siya nga hatagan og igong panahon nga maklaro matud pa ang tanan gumikan kay buot niya nga musulti sa tinuod ngadto sa entertainment press.

Managlahi’g batasan, maong nagbuwag!

‘Cultural-social differences” ang gitumbok nga rason sa usa lamang ka buwan nga panaghigugmaay nila ni Derek Ramsay ug Cristine Reyes.

Usa ka tinubdan nga suod sa duruha mitug-an ngadto sa Philippine Star Entertainment nga ang managlahi nga batasan o gawi nila ni Cristine ug Derek ang hinungdan sa ilang panagbuwag.

‘Magkaiba sila ng upbringing,’ nagkanayon ang tinubdan ni Phil Star entertainment editor Ricky Lo.

Buot niyang pasabot, maayo’g gawi si Derek, pino manglihok ug mahigugmaon sa pamilya. Samtang ang sexy star, dugang pa sa  tinubdan, ‘Cristine is something else.’
Kahinumduman nga August 28, sila nagkauyab si Cristine ug Derek, diin ang aktor mismo ang miangkon niini, dungan usab sa pagkaon niya sa iyang unang pamahayag nga dili na siya makigrelasyon og taga showbiz, human usab sa panagbuwag nila ni Angelica Panganiban.

Gibutyag ni Derek niadtong higayona nga gilat-angan na nila ang “usual courtship” sanglit dugay na sila nga managhigala ni Cristine ug nakaila na sila sa usa’g-usa.

Apan niadtong September 30, mibuto ang taho nga nagbuwag na ang duruha ug si Derek matud pa maoy mitapos sa relasyon.