Mag-concert sa Canada

CEBU, Philippines - Human sa kalampusan sa pelikulang “Bakit Hindi Ka Crush Ng Crush Mo” gikatakdang mag-concert ang mga bida niini nga sila si Kim Chiu ug Xian Lim didto sa Toronto Pavillion, Canada karong Sabado, September 14.  Ang nahisgutang concert nag-ulohan og "Kim and Xian With Friends”.

Billy mihatag og katin-awan

Todo deny si Billy Crawford sa isyu nga matud pa naglikay siya nga magkaabot sila sa iyang kanhi uyab nga si Nikki Gil hinungdan nga wala siya nitikang sa Star Magic Ball. Depensa pa ni Billy nga duna siya’y out-of-town show niadtong higayona hinungdan nga wala siya makalugwa sa kalihukan sa Star Magic.

TV5 dili mogukod ni Willie

Ang Chief Entertainment Content Officer saTV5 nga si Ms. Wilma Galvante nibutyag nga wala’y plano ang network nga mogukod kang Willie Revillame ug ilaha kining buhian. Una na nga gipadayag ni Willie nga dili na siya mo-renew sa TV 5, gani kutob na lamang karong October 15, ang show niya nga Wowowillie.

Gihunong

Gihunong una sa TV5 ang pag-imbitar og mga artista sa laing planeta nga motapon sa ilang network. Suma pa ni Wilma Galvante nga igo na ang gidaghanon sa mga artist sa TV5 ug mao kini ang ilang i-develop og maayo.

Juday mo-renew karon sa Dos

Gikatakdang mo-renew karong adlawa sa iyang kontrata sa ABS-CBN ang aktres nga si Judy Ann Santos. Gipaabot nga molugwa sa contract signing ni Judy Ann ang tanan nga top executives sa Kapamilya network ug ang iyang manager nga si Alfie Lorenzo.

Isabelle gikasab-an ni Direk Joel

Giangkon ni Isabelle Daza nga makapila na ka higayon nga gikasab-an siya ni Direk Joel Lamangan gumikan kay maglisod siya sa pipila niya ka mga eksena sa pelikulang Lihis. Pero nagpasalamat si Isabelle kang Direk Joel gumikan kay nakatabang kini kaniya aron mahanas ang iyang pag-arte.

Nagdedmahay

  Gikatahong wala magtingog sila si Lovi Poe ug Jake Cuenca sa premiere night sa pelikula nila nga Lihis niadtong Domingo. Nasayran nga si Rocco Nacino na ang bag-ong suod nga higala ni Lovi ug gidungog usab nga midiskarte na kini og sugod ngadto sa aktres.

Ekstra gilinyahan sa Canada

Nagmaya og maayo si Governor Vilma Santos-Recto gumikan kay gilinyahan og maayo ang indie film niya nga Ekstra didto sa Canada alang sa special screening niini sa Toronto Film Festival.

Edu mipahuway sa pag-arte

Tsika pa ni Edu Manzano nga dili una siya manawat og mga teleserye ug movie projects gumikan kay ganahan una siya molihay sa mga binuntagay nga taping. Gihatagan ni Edu og atensyon ang game comedy-talk-show niya sa TV5 nga What’s Up Doods?

Balik sa gym

Nakabalik na sa pag-gym si Gabby Eigenmann gumikan kay nahuman na ang seryeng Mundo Mo’y Akin. Wala pa’y ideya si Gabby sa iyang sunod nga project busa gihatagan niya og pagtagad karon ang pagporma og balik sa iyang lawas.

Aga gidugangan og show

Malipayon si Aga Muhlach gumikan kay gawas sa nagpadayon niya nga programa sa TV5 nga Pinoy Explorer, aduna siya’y dugang show sa maong network nga sugdan sunod buwan ug usa kini ka game show.

Erik nahulga sa bag-ong singers

Atol sa pictorial ni Erik Santos alang  sa umaabot niya nga10th anniversary concert karong  November, giangkon ni Erik Santos nga nag-atubang og hulga ang iyang career gumikan sa mga bag-ong singers. Apan gitataw ni Erik nga mao na kini ang iyang tsansa nga iyang ipakita sa publiko ang uban pa niya nga estilo sa pagkanta.

Sugbuanon midiskarte ni Lian

Giangkon ni Lian Paz nga gipanguyaban siya sa basketball player ug sa businessman nga Sugbuanon nga si John Cabahug. Nag-date na sila niini ug lengua pa niya, “Siya ang nagpapasaya sa akin,”.

Aljur mi-deny sa report

Nagkatawa nga gihimakak ni Aljur Abrenica ang nitumaw nga istorya nga matud pa interesado siya mobalhin sa ABS-CBN. Matud pa sa aktor nga wala siya’y ideya sa maong nigawas nga istorya ug giklaro niya nga magpabilin siya sa GMA, gani aduna siya’y kontrata sa maong istasyon.

Kiray sa MMK

Ang aktres nga si Kiray Celis maoy mopahilak sa mga tawo sa umaabot nga episode  sa  “Maalaala Mo Kaya”  karong Sabado. . Makauban ni Kiray sila si Tetchie Agbayani, Ronnie Lazaro, Aaliyah Belmoro, Gilleth Sandico, Marnie Lapuz, Raquel Villavicencio, Young JV, Bianca Casado, EJ Jallorina, Marie Joy Dalo ug Alec Dungo. (Sanden J. Anadia)

Amaya gipistahan sa Cambodia

Ang epic serye ni Marian Rivera  niadto sa GMA- nga  “Amaya”   maoy usa sa gipistahan karon didto sa  Phnom Penh, ang  capital sa  Cambodia.

Nasayran nga gisalida ang Amaya matag alas dose sa udto sa MyTV, mao kini ang local channel sa Cambodia nga nagsalida og mga Kapuso TV series.

Suma pa sa report nga kung isalida na gani ang Amaya, magdinaganay ang mga tawo sa maong dapit aron lang gyud motan-aw  sa maong epic serye.

Kahinumduman nga nisikat usab sa maong nasud niadto ang laing serye sa GMA-7 nga “Impostora,” nga gibidahan nila ni Iza Calzado ug Sunshine Dizon.

Update sa Miss World Megan pasok sa Beach Fashion Event

Gikan sa 33 ka mga kandidata nga nasulod sa shortlist, 11 ka finalists ang napilian aron magtigi sa  Beach Fashion event  sa Miss World 2013 ug usa na niini ang pambato sa Pilipinas nga si Megan Young.

Gawas sa Pilipinas, nalakip sa listahan ang mga kandidata nga nagikan sa Indonesia, Ivory Coast, Ghana, Spain, Jamaica, France, Brazil, Venezuela, China, Italy ug Japan. Nagpadayon ang pre-pageant activities sa Miss World kung diin grand coronation night niini mahitabo na karong September 28 didto sa Bali, Indonesia.

Morisette nakuyawan ni Maki!

Nagmaya pag-ayo ang Sugbuanon nga si Morisette Amon sa pagkaluwas niya atol sa Top 16 live show sa  “The Voice of the Philippines” niadtong Domingo sa gabii.

Gipaukay ni Morissette ang katawhan sa rendisyon niya sa awit nga “What About Love”  nga orihinal nga giawit sa international singer nga si Heart.

Suma pa niya nga usa kini ka rock song ug iyaha gyud kini nga gikonsulta sa iyang amahan kinsa mahiligon usab sa musika.

Gikatigi ni Morissette si Maki Ricafort kinsa nikanta og Every Breath You Take Away.

“Kulba gyud kaayo kay gamay ra gyud ang akong labaw sa public votes. Nakakuha ko og 51%, ug si Kuya Maki kay nakakuha og 49%,” matud pa ni Morissette sa ekslusibo nga paghinabi niini dinhi sa Banat News Hugyaw kagahapon sa hapon.

Dugang pa niya nga dili basta-basta si Maki gumikan kay iyaha na kini nga nakauban sa trabaho kung diin nagsilbi kini nga musical director.

“Akong gibuhat ato, gitarong na lang gyud nako ang akong performance.  Salamat kaayo sa taga Cebu nga kanunay ni-support nako,” matud pa niya.

Padayon nga mag-agi og daghang level si Morissette ug iyang pamatud-an sa kadaghanan nga dili gyud basta-basta ang mga Sugbuanon sa natad sa pag-awit.

Nagkanayon si Morissette nga dako gyud kaayo og natabang kaniya ang iyang coach nga si Sarah Geronimo gumikan kay dili lisod ang mga instruction niini busa dali niya ma-apply ang mga tambag niini.

“Sa tanang taga Cebu, buhaton gyud nako ang tanan, ug para ni sa inyo ang gibuhat nako nga paningkamot sa The Voice,” saysay pa niya.

Subling giklaro ni Morissette nga dili angay nga kahibudngan nga taga Quezon City ang pag-introduce sa The Voice sa iyang address sanglit sa maong dapit man siya nag-audition apan ang matuod, 100% siya nga Cebuana.

Ikaw na kaha? Rising Star On TV

Mahiligon ka ba nga mukanta? Ganahan ka ba nga mag-record sa imong kanta apan wala kay kwarta nga ikabayad? O ganahan ka ba nga mamahimong internet sensation? Kun “yes” ang imong tubag sa maong pangutana, pwes, ang “Rising Stars On TV” na maoy tubag sa imong kagustuhan.

Ang Rising Stars On TV, usa ka contest nga gitumong alang sa tanang mahiligon mukanta—professional o amateur—nga nag-edad og 13-anyos pataas. Babaye o lalaki, bayot o tomboy mamahimong manimpad niining maong indigay nga nagsugod na September 4, ug mulungtad hangtud September 24 diha sa SM City Cebu.

Ang imong buhaton, mao nga mutekang ka lang sa Rising Stars On TV recording booth nga naa mahimutang sa SM City Food Court during mall hours, aron mag-record sa imong kanta. Mukabat ngadto sa 800 ka mga kanta ang mamahimo nimong kapilian gikan sa classic ngadto na sa pop.

Adunay mga music producers nga maoy nagdumala sa maong recording booth nga maoy mutudlo nimo unsay mas maayong buhaton aron mas manindot pa ang imong recording. Human nimo og record, automatic ka na nga apil sa nahisgutang indigay.

Nasayran nga magdepende sa gidaghanon sa mga tawo nga nagtinguha nga mag-record, kun gamay lamang gani ang naglinya, mamahimo ka nga magbalik-balik pag-record aron mas makapili ka unsay imong i-submit isip contest entry.

Ang nakanindot kay makabuot ka sa special effects para sa imong na-record nga kanta.

Mamahimo nimo kining i-share sa imong Facebook ug Twitter account, diin ang labing daghan og likes makadawat usab og premyo gikan sa SM City.

Matag semana, upat ka mga mananaog ang pilion, aron maoy maglangkub sa 12 finalists nga magtigi sa grand finals karong September 27, nga ipahigayon diha sa SM City Entertainment Center.  Ang mananaog makadawat og P12, 000 worth of SM gift certificates.

 Si Andrew Gonczi, Managing Director sa Rising Stars miingon nga gituyo nila nga dinhi sa Sugbo magbutang og recording booth, sanglit nabaniog nga kun pagkanta na ang hisgutan daghan kaayong mga maayo og tingog dinhi. Gawas pa, buot usab ilang kumpaniya nga makatabang niadtong adunay talent sa pagkanta apan walay ikabayad alang sa recording.

Mukabat ngadto sa P43,000 worth of SM gift certificates ang premyo niining maong indigay. Ang mananaog sa matag semana nga elimination adunay madawat usab nga premyo. Gibanabana nga mulapas ngadto sa 20 ka mga tawo ang mubisita sa Rising Stars recording booth matag adlaw aron musalmot sa nahisgutang bangga sa awit.

Samtang giklaro ni Gonzci nga bukas kini alang sa tanan, bisan og dili taga Cebu apan makahimo pagbisita sa ilang recording booth diha sa SM.

Alang sa dugang kasayuran bisitaha ang: www. Risingstars.ph/ontv o pakighigala pinaagi sa www.facebook.com/risingstars.ph (BANAT NEWS)