Pangandam na alang sa Father’s Day

Tibuok kalibutan ang magsaulog sa Father’s Day matag ikatulo nga Domingo sa buwan sa Hunyo.

Pero mga ka-bonding naku dinhi sa Banat News IN, sunod Domingo na ang Father’s Day, apan nag-una una lang ko og suwat aron duna mo’y higayon nga makapangandam sa  maong espesyal nga adlaw alang sa atong mga amahan.

Giila natu siya nga “haligi ng tahanan” gumikan kay usa siya sa dali nga manalipod  kanato sa nagkadaiyang mga pagsuway nga atung masugatan. Daghan kanato ang mobati og kalipay kung sa panahon nga naa kita sa kagul-anan, anaa ang atong amahan.

 Anaa siya kanunay nga andam nga mosawo kung ang usa ka anak adunay kapakyasan.Angayan gayud natong pasalamatan ang atong amahan sa mga kahago nga gihatag nila kanato. 

Sa pag-abot sa adlaw sa mga amahan, usahay mangandoy kita og nindot nga regalo para kang tatay isip pagpakita sa atong gugma kaniya.

 Apan, dili na kinahanglan nga mahalon nga butang ang atong ihatag, kay bisan og  simple nga butang apan gikan sa kasing-kasing makalipay na gayud kini kaniya.

Ania ang pipila sa mga koleksyon ug ideya nga siguradong maka inspire kanato nga mag-andam og espesyal nga regalo para sa espesyal nga adlaw ni tatay

Scrapbook para ni Tatay

Usa sa labing creative ug mahuna-hunaon nga regalo mao ang scrapbook. Talagsaon apan praktikal nga regalo sa adlaw sa mga amahan. Unang buhaton sa pagama og scrapbook mao ang paghuna-huna og  tema. Isunod dayon ang pag -arrange sa mga materyales nga makatabang sa imong idea nga magmalampuson. Mga materyales sama sa  mga litrato, mensahe, poems, mga butang nga pang-dekorasyon sama sa glitter ug uban pa.

Hugyaw nga Unlan

Usa sa labing barato mao  ang pagpalit og punda sa unlan ug mahimo kini nga ma-personalize pinaagi sa pagbutang sa pangalan ni tatay.. Ipagawas ang imong pagka -creative ug malipay gyud si tatay niini.

Simple nga cake

Puwede ra nga mohatag kita og simple nga cake gumikan kay buot man ta magdaginot. Apan kung duna kay dako nga natigom, depende ra nimo kung mopalit ka og dako nga cake. Ang importante lang nga ma-feel ni tatay nga espesyal gyud siya sa inyong pamilya.

Tapok-tapok

 Pagmugna og Father’s Day party o tapok-tapok para ni tatay. Sayon ra gyud kini pagabuhaton, gamay nga plano ug paningkamot lang ang gikinahanglan. Pwede ikaw ang mag-andam sa mga pagkaon o mangayo ka’g  amot sa ubang miyembro sa pamilya. (Madungog si Princess Mikay sa 95.5 Star FM , 9-11am gikan sa Lunes hangtud sa Biyernes sa It’s All For You In The Morning)