Salamat Ma!

Happy Sunday! Sobra ka espesyal karong adlawa para sa atong mga mommy, nanay, mama, inay or unsa pa tawag nato sa atong mga pinalanggang inahan. Sila ang nagdala nato niining kalibutana ug dagko kaayo ilang sakripisyo mahatagan lamang kita og maayong kinabuhi. Mao na, Happy Mother’s Day sa tanang mga inahan dira ilabina sa akong gwapang inahan nga si Maricor Arcay Igpit, nga suki sad nako niini akong lindog. Salamat sa tanan ma and I love you! Happy birthday sad sa akong cute nga pag-umangkon nga si Red Sumaylo!

Karong adlawa, kahibaw kong naglibog mo og unsay angayan ninyong buhaton para saulogon ang Mother’s Day. Mao nga naa koy paambitan kaninyo nga mga tips para naa moy gamay nga ideya og unsaon ninyo pagpakita sa inyong mga inahan sa inyong pagpangga kanila ilabina niining espesyal nga adlaw.

1. Espesyal nga pamahaw – Ang atong inahan, bisan unsa na sila kakapoy, momata gyud og sayo para maka degamo ug maka andam sa atong mga pamahaw. Karong adlawa, dapat tagaan ninyo siya og higayon nga makapahuway. Himoa kini nga espesyal, kamo mga anak ang mag-andam og pamahaw. Planoha ang inyong lutuon, ang presentasyon ug dad-a kini sa iyang katre. Breakfast in bed lang ang drama.

2. Greeting Cards – Karong panahona, dili na gyud kaayo uso ang greeting cards, mao nga mas maganahan ang atong mga inahan kung ato silang tagaan og personal gyud nga card. Mao kini ang ilang gihimo sa ilang panahon, ug sigurado ko nga malipay gyud sila makadawat og ingon niini gikan sa ilang anak.

3. Flowers – Common man, pero ang atong mga inahan malipay gyud kung makadawat og buwak. Dapat kahibaw ka unsa iyang paborito nga buwak, o pag-research kung unsa iyang birth flower. Ipadala kini sa iyang kwarto inig mata niya, o ba kaya sa iyang trabahuan. Pakapini og personal nga card gikan nimo.

4. Kanta o Balak – Kung ikaw talented ug mahilig mohimo og kanta ug balak, mao kini ang perfect time nga imong mahimuan imong mama. Kung dili ka ingon niana  ka maayo mobuhat, pwede kang mangita sa mga libro o sa internet unya imo ning ihalad kaniya.

5. Limpyohi ug decorate her kwarto – Kahibaw ko kusog mo yawyaw inyong mga mama kay pirmi gubot inyong mga kwarto. Karong adlawa, ipakita niya unsa siya ka espesyal by cleaning and decorating her room. Pwede nimo kining i-renovate, pintalan og bag-ong color nga iyang ganahan o i-arrange iyang cabinet o closet. Sigurado ko nga ma proud gyud imong inahan sa imong buhaton.

6. Bake – Kung ikaw mahilig mo bake, pag-bake og cake o bisan unsang klase nga pastry para sa imong mama. Pilia iyang favorite nga flavor ug color unya maoy i-decorate with matching greeting. Pwede nimo kining iandam sa inyong panihapon o ipadala ba kaha sa iyang opisina para ma share niya sa iyang mga kauban.

7. Pamper – Kay Domingo man ug way trabaho, pwede nimo bangkahan imong mama og spa treatment. Daghan na karong nindot nga spa ug salons sa Cebu nga barato lamang. Tagai syag oras nga maka enjoy og lami nga masahe, manicure, pedicure, body scrub, hot oil, haircut ug uban pa. Dili lamang siya malipay, maka relaks pa siya og taman.

8. Date – Gahini og oras inyong mga inahan by bringing her out sa usa ka dinner. Mas maayo gyud nga magpa reserve mo daan sa usa ka restaurant tungod kay daghan gyud mangaon og puno kini kanunay. Pili og lugar nga dili kaayo daghan og tawo ug intimate ang setting. Kung di mo ganahan mogasto og dako, pwede sa balay lang. Pwede pud mopalit mo sa gawas og pagkaon o inyo siyang lutuan sa inyong panimalay.

9. Travel – Kung ang imong mama mahilig mo larga, pwede kang mag book og trip. Sa gawas man kini sa nasod, o diri lang sa Pilipinas, o bisan diri lamang gawas sa syudad sa Sugbo, makalipay na kini niya. Daghang nindot nga lugar pwede ninyong adtuan for a day trip lang. Pwede mo moadto og Carcar, Oslob, Bantayan o Malapascua. Naa say Bohol, Dumaguete ug Siquijor nga dali ra nga adtuon.

10. Surprise her – Ang sorpresa gyud ang labing nindot nga regalo para sa imong mama. Bisan unsa nga klase, sigurua lang nga kini iyahang gusto. Pwede nimo siya palitan og paborito niya nga perfume, o movie ticket ba.