Mao Na Ni All Over The World! Mga Ka Tribung BisChikadora!

Malipayon ko nga bisan pa man sa akong ka busy mapasigarbuhon kaayo ko nga basta wala ko’y mga raket o shows usa sa mga lugar nga dili mawala sa akong listahan para bisitahon nako kay ang Englis V-Rama, sama sa akong BisChika, dinhi ko nagdako, dinhi ko nagdalaga..hahahhaha! Dinhi ko na inlove, nasakitan, ug uban pa.

Pero usa sa mga angay pa gyud diay nako ipasigarbo kay dunay pagahimuon  ang Barangay Guadalupe nga Banauan Festival, sa labing unang higayon. Siyempre proud kaayo ang inyong Yur’s truly nga ang Englis V Rama ug mga silingang sitio kay apil aning indigay. Unsa man kining  Banauan Festival? Sumala pa ni Dough Labra, “Sa unang higayon karung Disyembre 8, 2012,  pagasugdan  nato ang pundok Banauanon, usa kini pag-abli sa kagahapon, sa wala pa nailhan ug nahimo nga Guadalupenhon.” Ang maong dakong pasundayag sugaton kini og usa ka indigay sa sayaw nga magsugod sa Banawa, mutuyok unya mogawas sa Happy Valley ug mahuman atubangan sa hawanan sa Archdiocesan Shrine of Our Lady of Guadalupe. Dugang pa ni Dough Labra, “ kini ang magsilbi sa pagbuhi sa makasaysayanong pagsulod sa grupo nga gipasiugdahan ni Rajah Topas, dala ang imahin sa Mahal nga Birhen sa Guadalupe ug mao’y nakapahimo karun nga  Barangay Guadalupe. Kini mamahimong silbing inspirasyon ug maghatag sa mga bag-ong henerasyon o sa mga umaabot pa nga henerasyon.”  Busa magkita kita ug kamo mismo mga Ka Tribung BisChikadora bisa’g asa pa man kang lugara gikan, pwede kaayo kamo mosaksi. Pagasugdan ang street dancing alas tres sa hapon ug alas otso sa gabii ang contest proper.

Mo bow ko sa mga Gay’s Unlimited kay bisan ang ubang miyembro niini nigahin gyud og higayon para makatabang sa Pundok Englisanon Dance Company (ang ngalan sa grupo ) ug ang ilang choreographer nga si Cliff Yunson Racuya. Human sa dugay nga panahon, siguro kining maong festival mao ang nahimong tulay para magkaistorya kami og balik sa akong amigang Cliff. Wala ko nagpaulahi  og pangutana kaniya kay dili lang siya talented sa pagmake- up apan maayo pud siya mo tudlo. Ania ang tipik sa among BisChika ;

BisChika; Pila naka ka tuig nag-choreograph amegang Cliff ?

Cliff Yunson Racuya:  Kinsi na ka tuig ko nagtudlo, Yur, ang akong kasinatian maoy naghatag nako og igong kusog nga magtudlo sa mga silingan nato, bisan asa na pud ko naabot Luzon, Visayas ug Mindanao na ang akong beauty naabot og tinudlo.

BisChika: Unsa imong naagian nga pagsuway niining festival karun?

CYR:  Sa pagpundok sa napulo ka sityo, nagkalainlain mga tawo akong gitapok, mao nagkalainlain pud nga mga batasan, pero ang challenge gyud nako Yur kay ang pagpangita og sponsors para sa among costumes, props, talent fee para sa mga instrumentalist, ug pagkaon sa labaw sa gatos nga mga participants, pero ang nakanindot Yur , kay abtik pud kaayo ang mga sityo leaders/ committees  napundok namo ang youth members sa lainlaing sitios ug mao nga gitawag namo siya og “ Pundok Englisanon  Dance Company,(Sitio Esco, Sitio Eyha, Sitio Perpaas, Sitio Fatima, Sitio Sudina, Sitio Susco, Sitio Yga, Sitio Riverside, Sitio Epra, Sitio Cypa, Espina Village).

BisChika: Asa ka nagkuha og inspirasyon sa imong gitudloan karun?

CYR: Dancing is my passion. Sa akong pamilya ug sa mga dancers mismo, labaw sa tanan sa Ginoo nga naghatag nako og talent, ang akong mga nakat-unan usab sa akong mga mentors mao nga akong gipaambit pud nila. Gamay pa ko sige ko’g kuyog nila Cha Ronnie Matudan ug sa Sandiego ilang Tito Val ug Tita Booging. Grade 1 hangtud karun sige kog sayaw og Sinulog.

BisChika:  Sa imong tan-aw makadaug mo?

CYR:  Naay walo ka contingent Yur, kaming tanan among gibuhat ang among best , ang grupo nagpraktis halos taga adlaw, karung Dec. 8 buhaton namo ang tanan. Si Lord na ang bahala namo basta kami among ihalad kaniya ang among talento ug pasalamat pinaagi sa among pagsayaw.

BisChika: Dec. 8 naman gyud ang labing unang Banauan Festival, unsa ang imong mensahe?

CYR:  Dance from your heart, love your music and the audience.

Wow! Hugyaw ang akong amegang Cliff nga mao choreographer sa Englis, usa lang ang akong ma BisChika kaninyong tanan. Goodluck! Do your best! 

Viva Birhen sa Guadalupe!